India mi, Father of Library Science ti a koh Dr. S.R. Ranganathan-a piancham 12th August hi Govt. of India, Ministry of Culture chuan ram puma hman turin ‘Librarian’s Day’ atan a puang a. Art & Culture Department hnuaia State Central Library chuan nikum 2010 atang khan Librarian’s Day hi a hmang tan a. Tun hi vawi 2 hmanna tur a lo ni chho ta a ni.

Library Science thiamna a miropui chung chuang, 1892 a piang India rama Public Library service kalpuina tur atana innghahna lungphum pawimawh Model Library Act duang chhuak a, 1942-a Draft Model Indian Libraries Act duang chhova, Public Library Act hmasa ber Madras Public Libraries Act 1948 a hmalakna avanga passed lo ni ta hian Dr. S.R. Ranganathan-a chungchuan zia a tichiang hle a ni. India rama Public Library Act nei hmasa ber State, Madras University a Librarian hmasa ber a ni a. 1933-ah khawvel a hriatna chi hrang hrang ‘Universe of Knowledge’ felfai leh awmze neia thliarhranna tur ‘classification scheme’ lar leh hmingthang tak ‘Colon classification’ duang chhuaktu a ni a. Library service tihhmasawnna tur atana innghahna pawimawh tak ‘Five Laws of Library Science’ chu 1931 ah a duang chhuak bawk a ni. Heng Library dan panga-te hi India ram leh khawvelin a zir chho mek zel a ni.

Mizoram context-ah lo lut ila Dr. S.R. Ranganathana-an Model Library Act a lo duan chhoh tawhna hmalakna kal zel avangin Mizoram pawhin 1993 khan Library Act ‘ The Mizoram Public Libraries Act 1993’ kan lo nei tawh a. Library service hi dan fel tak hnuaia dah a nih chauhvin library service hi awmze neiin a kal thei a, hriatna leh finna tangkai, chhawrbawk tham nei tura mifing leh mithiamten research tan chhana an thil hmuhchhuah thuziak hmanga an dahte hi mitinten tihtak zeta kan haichhuah hi hriatna leh finna hmanga ram siamthatna bul a ni. Librarian’s Day 12th August, 2011 lo inher chhuakah hian School zirlai, college zirlai, university zirlaite leh mipui vantlang nawlpuiten lehkhabu tha kan chhiar uar theih nana Library kan hman tangkai theuh hi Librarian’s Day thuchah pawimawh a ni.