Vawiin hian Serchhip District a NLUP Line Department hrang hrangte chuan NLUP – NEDP Convergence Phase II tanpuina dawngtu tura thlan te hnenah Training pein, tanpuina an sem hlawm.

Agriculture Department chuan vawiin chhun dar 12 khan New Serchhip YMA Hall ah Pu James Lalsiamliana, DAO kaihhruaiin NLUP -NEDP Convergence Phase II, First Instalment tanpuina dawng tura thlante tan Training leh tanpuina sem ani a. Agriculture Department hnuaiah hian WRC ah mi 75, WRC –II ah mi 56, Sugarcane ah mi 19 leh Oil palm ah mi 2, an vaiin mi 153 te hnenah First Instalment hi pek an ni.

Horticulture Department pawhin Phase II NLUP-NEDP Convergence hnuai atanga an Department kaltlanga tanpuina dawngtu turte tan Supervisory Training Centre, Serchhip Chanmary vengah Pi M. Vanlalzami, DHO kaihruaiin training buatsaih a ni a, tanpuina sum hi an sem nghal a ni.  He tanpuina dawng tute chu M. Orange trade hi chhungkaw 100, Lakhuihtei trade chhungkaw 28, Balhla chhungkaw 8 leh Sapthei chhungkaw 3, an vaiin chhungkaw 152 an ni.

AH & Vety pawhin Serchhip khawpui leh a chhehvel a mite tan Dr. C Zarzokima, DVO kaihhruaina hnuaiah P&E YMA Hall ah Training hi an buatsaiha. Calendar of Works hrilhfiahna hun Dr. R. Lalmakthanga, CVO leh Dr. R. Vanlalrawna, VO ten an nei bawk. Vawiina vek hian AH & Vety Department hian N. Vanlaiphaiah, Chhingchhip leh Thenzawl bakah Vety Centres awmna khaw hrang hrang parukah training leh tanpuina semna hi an nei bawk. AH & Vety Department kaltlang hian District chhungah Bawnglian vulh thlangtu chhungkaw 4, Tlangbawng chhungkaw 26, Sial chhungkaw 48, Vawk chhungkaw 269, Ar chhungkaw 185 leh Kel vulh thlangtu chhungkaw 1, an vaiin mi 533 an awm a ni.

Sericulture Department pawhin vawiin vek hian an Office ah, Pu Zothansanga, DSO kaihhruaiin NLUP –NEDP Convergence Phase II hnuaia pangang khawia tanpuina dawng tura thlan chhungkaw pahnihte chu training pein tanpuina hi an hlan nghal a. Mithiam ten tanpuina dawngtute hi Thingtheihmu chin dan te, a enkawl zui dan leh Silkworm pangang khawi dan chipchiar taka zirtirna an pe a ni. Soil Department pawhin vawiin vek hian an pisaah an Department kaltlanga NLUP _NEDP Convergence Phase II tanpuina dawng tura thlan te chu training pein tanpuina an pe a. Serchhip District Industries Centre hnuaiah pawh he NLUP – NEDP Convergence Phase II hi trade hrang hrang 16 ah chhungkaw 402 te chu tanpuina dawng tura thlan an ni a. District Industries Ccentre hian heng an beneficiary te hi June- July, 2018 chhung khan Training an lo pe chhuak vek tawh a, tanpuina hi vawiin hian an semchhuak ve nghal a ni.

Vawiina Line Department hrang hrang hnuaia tanpuina Phase II First Instalment hi Rs. 50000 zela semchhuah a ni a. Line Department te hian dawngtue hi an Bank Account ah an thun sak zel a, training uluk tak pek an nih vek bakah, intiamkamna an ziak theuhva. An intiamkamnaah chuan a nihna ang taka an hmang lo a nih chuan Second Instalment dawng thei lo tur leh, an lo dawn tawh sa pawh lakkir sak theih a nih thu a chuang a ni.