CSIR-NEIST leh Disaster Management & Rehabilitation Department tangkawpa huaihawt Exchange Meeting on Earthquake Preparedness Campaign Programme chu vawiin chawhma dar 11:00 khan I&PR Conference Room ah neih a ni.

DM&R Addl. Secretary Pu Sangdingliana'n meeting hi kaihruaiin mithiam hrang hrang - Dr Lalrokima Chenkual, Head Faculty, ATI (DM Centre), Dr Saitluanga Sailo, HoD Geology, PUC, Pu F.Lalbiakmawia, Scientist, MIRSAC leh Pu Lalhmunsanga Hnamte, Jt. Director, DM&R ten thupui hrang hrang an sawi a, lirnghing hlauhawm thlen theihna Mizoram ah uluk tak leh theihtawpa kan lo inbuatsaih lawk a pawimawh zia te meeting ah hian sawilan a ni a. Lirnghing-in thihna, in leh lo leh bungrua chhiatna nasa tak a thlen theih hriain, inbuatsaihlawkna tha leh tha lovin chhiatna thlenah kawngro nasa takin a sut theih avangin mitin mahni theihna zawn theuhvah kan inbuatsaih a tul thu te sawi a ni bawk. Lirnghing hi lo thleng thut thei reng a nih avangin lo inralrin dan chungchang hi mipui nawlpui tan inhrilhhriatna beihpui uar zawka thlak a tul thu te an sawi ho bawk.