Lirnghing lo thlen thulha mimal, khawtlang leh state ang te-a kan inralrin dan enchhin nan hmarchhak state zawng zawng ah National Disaster Management Authority chuan lirnghing dinhmun nunchan a buatsaih mek a, State 8, khawpui 16, hmun 80 a he Mega Mock Exercise neih turah hian Mizoram ah chuan ni 13 March, 2014 khian Aizawl leh Serchhip ah neih tum a ni. Mizoram chhim lam District 4 - Lunglei, Serchhip, Lawngtlai leh Saiha District te tan Serchhip ah neih a ni ang a. Aizawl, Champhai, Mamit leh Kolasib District te tan Aizawl ah neih a ni ve thung dawn a ni.

Aizawl-a he Mega Mock Exercise atan hian team hrang hrang siam a ni a, chuta mawhphurtu tur te chu vawiin khan Incident Commander Aizawl DC Dr. Franklin Laltinkhuma chuan ko khawm in DC Committee Room ah training neihpui an ni. Dr. Lalrokima Chenkual, Head Faculty, ATI (DM Centre)-in training neih puiin Mega Mock Exercise neih huna an chanvo leh mawhphurhna te an inhrilhfiah a, chhiatna rapthlak thlen thei lirnghing lo thlen thut huna tha leh mumal zawka kan lo inralrin tlan theih nan he Mega Mock Exercise hi ruahman a ni.