Vawiin khan NLUP Nodal Minister Pu R.Lalzirliana hovin NLUP Implementing Board (NIB)member tharte chu a vawi khatna atan NIB conference hall-ah an thu khawm a. NLUP 3rd & 4th phase kalpuina tura project kalphung siam that leh thlak danglam ngai te an sawi ho.

NLUP 3rd & 4th phase beneficiary te trade thlan chungchangah compact area anga hma lak a nih theih tawh nan rawtna hrang hrang te sawiho a ni a. NLUP atanga eizawnna leh sumdawnna ngelnghet din turin district hrang hrangah a hlawpa thlai chin (cluster area plantation) kalpui a nih theih nan 1st & 2nd phase atanga potential area hriat chian sa te lo dap chhuak a, D.C te hnenah ni 14 chhunga hriattir turin line department te chu mawhphurhna pek an ni a. Hmunphiah hralh chhuah chungchanga hmalakna tur pawimawh te sawiho a ni bawk a. Hmunphiaha eizawnna chungchangah hian Forest department in hmunphiah 1kg ah royalty Rs.7/- a lak thin chu kuthnathawktu te tan phurrit a nih avangin Re 1/- la tawh tura Chief Minister in thutlukna a siam, tun thlenga la tih puitlin loh chu ti puitling turin Forest department chu hma la nghal tura tih a ni.

Tun hnaia NLUP kalphung thlak danglamin a hrin chhuah, NIB enkawlna hnuaia marketing leh monitoring dah lo ni ta chu vawiin meeting ah hian a buaipui tu tur inruat a ni a. Line department hrang hrang te thlai chi leh hmanraw mamawh lakkhawm leh sem chhuah dan tura ruahmanna siam te, beneficiary te hnena ram sem tawh dan te thlir ho a ni bawk.

Vawiina meeting ah hian UN Mission team leh Mizoram sorkar thawh dunna tur chungchangah NIB Vice Chairman Pu P.L.Thanga’n report a pe a. UN Mission team in ruahmanna a lo siam angin UN technical team ten April thla chhung hian Mizoram an rawn tlawh dawn a. Area thlan chhuah bik eng emaw zata thawh hona turin Mizoram tan project an rawn siam dawn a ni.

Vawiin NIB member thar thutkhawm hmasa berah hian district hrang hrang atangin D.C leh an aiawh te, line department te bakah Non-official member te an tel kim hle a ni.