Vawiin khan I & PR Auditorium-ah Disaster Management & Rehabilitation Department leh GeoHazards Society tangkawpin, lirnghing leh leimin vanga chhiatna thlen thulha Aizawl khawpui a nghawng theih dan zirchianna an buatsaih leh hemi kawnga mipuite inralrin theih dan turte sawihona hun an hmang.
Dr. L. Thomas Tobin (Public Policy and Geotechnical Engineering), Senior Adviser, GeoHazards International, California chuan Mizoram chu lirnghing na tak thlen theihna hmuna awm a nih avangin, Aizawl khawpui leilung awmdan te, chenna in sak dan leh mihring nuna pawimawh hrang hrang leh chhiatrupna thlen thulha ruahmanna kan neih sa atang te in; lirnghing, a tehnaa 7.0-a nain a khawih pawi theih dan turte zirchianna buatsaih a nih thu a sawi a. Hei hi lirnghing lo thleng tur hrilhlawk tumna lam nilovin, hemi chungchanga mipuiten kan dinhmun kan hriatchian nan leh ruahmanna tha leh inpuahchahna tha tak nen erawh chhiatna rapthlak zawk thleng thei tur nasa takin kan tikiam thei a ni, tih inzirtirna atana buatsaih a nih thu a sawi bawk.
GeoHazards Society hi tlawmngai pawl, Delhi a hmunpui nei niin, India ramchhunga lirnghing leh harsatna dang thlen hlauhawmna hmunah te state sorkar te nena tangruala mipuite himna tura hma la thin an ni a; a zawmpui tlawmngai pawl tho California-a hmunpui nei, GeoHazards International hi kum 1991-a din niin, kum 21 chhung ram hrang hrang 20-ah khuarel chhiatna thlen tamna hmunah te nunna chan zat tihniam turin mipuite hnena zirtirna leh inpuahchahna bakah, chhanchhuahna hnathawh kawngah ruahmanna tha nei turin hma an lak pui thin. Aizawl khawpui zirchianna hi he pawl pahnih inthlunzawm atanga mithiam 12-in thla ruk chhung an kalpui a ni.
He hun hi Pu P.C. Lallawmsanga, Principal Secretary, Disaster Management & Rehabilitation Department chuan kaihruaiin; Pu P.C.Lallianthanga, SP(MPRO) lehkhabu ziah, “Chhiatrupna Laka Inven Dan” tih chu a tlangzarh nghal bawk. He sawihona hunah hian Pi M.Zohmingthangi, IAS (Rtd), CEO, Aizawl Municipal Council, Pu Dominic Lalhmangaiha bakah, line department hrang hrang hotute leh tlawmngai pawl aiawhte an tel a ni.
