1596/2025-2026

Aizawl, 25.9.2025: Vawiin khan Aizawl Traffic Police leh NIC, Mizoram hmalaknain SP Aizawl Conference Hall-ah “One-Day Training on the Electronic Detailed Accident Report (eDAR) Module (Forms 1 to 10), covering the form generation and submission processes” chungchangah Pilot Project atan training buatsaih a ni.

He hunah kaihruaitu Pu Ruatsanga Ralte, Sr.SP, Traffic cum Nodal Officer, eDAR, Mizoram Police chuan eDAR project chu Ministry of Road Transport and Highways (MoRTH), Govt. of India-in a duan a nih thu a sawifiah a. Kum tinin India ramah lirthei chetsualna case register zat chu 4,50,000 a tlin thin thu leh mi tam takin nunna an chan phah thin thu sawiin, lirthei chetsualna hian kawng hrang hrangin nghawng thalo tak tak a neih thin thu leh ram hmasawnna pawh nasa taka a tih thuanawp theih avangin Lirthei chetsualna titlem a, a veng tur hian mipuiah inzirtirna nasa zawka kalpui zel a tul thu a sawi. Hemi atan hian eDAR project hi a nih tur ang taka tangkai taka kan hman a tul tih a sawi a. Lirthei accident kaihhnawiha chhinchhiah ngaite dah luhna turin eDAR portal hi duan a ni a, heng atanga information lak khawm hmang hian Sorkar pawhin lirthei chetsualna titlem turin road engineering-ah te, emergency care-ah te, education leh law enforcement thlengin ruahmanna tha zawk a siam thei dawn tih a sawi bawk.

Khuallian Pu Dingluaia, DIG, CID cum SPoC, eDAR, Mizoram hnen atangin eDAR project pawimawhna leh a tangkaina tur ang taka kan hman chhoh zel a tul an tih thu te, lirthei chetsualna avanga harsatna kan tawh mekte sukiang tura mimal leh Sorkar department hrang hrang thawh ho zel a tul thu ngaihthlak a ni.

He hunah hian Pi Lalmuanawmi, Coordinator, eDAR, NIC, Mizoram hnen atangin eDAR pawimawhna chungchang sawifiahna ngaithlak a ni a.

Pu Robert Laltanpuia, eDAR Project, State Rollout Manager, NIC Mizoram leh Pu Albert Vanlalmuana, eDAR Project, District Rollout Manager, NIC, Mizoram chuan Police department-in lirthei chetsualna a thlen changa eDAR portal-a information dah ngai dah luh dan te zirtirna hun an hmang a ni.