Vawiin dt 13.12.2018 chhun dar 12 khan Traffic SP Pu H. Ramthlengliana, MPS chuan Lirthei khalhtu leh hmangtute him zawkna atana hriattur pawimawhte Press mite hnenah sawiin puanzar sak turin a ngen a. Traffic SP chuan No tolerance kan hman chhante leh Traffic Police duty chhan chu chetsualna laka mipui himna tura ven hna a ni ber ni sawiin lirthei chung chang avanga dan bawhchhia awm lohna State ni thei phei ila chuan ram nuamtak kan ni ngei ang a ti.

Hunpui boruakah fimkhur lehzuala lirthei khalh theuh turin lirthei khalhtu zawng zawngte a ngen a ni.

Fimkhur lehzual a tulna hetiang hian a sawi:

Rui chunga lirthei khalh lo turin driver zawng zawng te ngen kan ni a. Chutih rual chuan mipui ten rui chunga lirthei khalhtu kan hriat in ngawihbopui mai loin, thuneitute hnenah thlen nachang i hria ang u, chutiang lirthei-ah chuan chuang hauh lo turin inthurual thei bawk ila.

Driver zawng zawng te kan taksa zawh tawk ang zela thawk turin leh rim lutuka thawk lo turin kan in ngen bawk a ni.

Lirthei fit tha tawk lo vantlang kawngpuiah khalh chhuak lo ila, a brake pump ngai, a driver bik hre riau, a ke, pawh mam tak tawh head-light pakhat chauh eng thei, a part thenkhat tuamhlawm nana thirzai leh rubber leh chartin bung hial hman ngai tawhte pawh hi hunpui boruak ah hian mipui leh bungrua phurh nan hmang lo turin kan in ngen bawk a ni.

Driving license nei loin lirthei khalh lo ila, chutiang bawkin driving license nei lo lirthei i khalhtir lo ngam ang u.

Phurh tur aia tam bungrua leh mihring lirthei-ah I phur lo ngam ang u.

Hmangchang:

I lirthei chuanna Motor registration number hrechiang rawh. I lirthei chuanna a thil i tihbo palh emaw harsatna i neih palh a i lirthei chuanna chhuichhuah leh theih dan awmchhun chu a registration number chauh kha a ni.

Lirthei in a tipalh che anih chuan a tihpalhtu lirthei registration number kha chhinchhiah tlat ang che. Hliam i tuar anih chuan, a tipalhtu lirthei khalhtu khan damdawi in hnai ber ah a hruai tur che a ni a, in chetsual dan pawh Police Station hnai berah a report tur a ni.

I hmelhriatloh lirtheia i chuanin a theih hram chuan front seat a thu loin a hnung lamah thu hram ang che (hmeichhe tan bik).

Ke a kan kalin lirthei in min sut emaw min tai palh loh nan footpath hmang hram hram thin ang che.

Naupang emaw kum upa lam emaw kawngpuia kan kalpuiin kawng hnaih loh zawkah kal tir thin ang che.

Hunpui a lo thlen hian mi tam takin bazar kan pan khawm thin a, tawhsual kan tawhloh nan kawngpui emaw junction lai kan kan dawn anih chuan Traffic Police duty thu ngaichang in kawng kan kan thin tur a ni.

Dan bawhchhia i hmuh leh i hriat chuan Traffic Control Room number: i) 0389-2322307, ii) 0389-2313061. iii) 9366553559. iv) 9774440722 ah te hian I report (message hmang pawhin) thin ang u.