Vawiin khan Agriculture Department  DAO Office Champhai buatsaihin Organic Fair neih a ni a. Organic Fair hi Paramparaghat Krishi Vikas Yojana (PKVY) kaltlanga buatsaih niin, Pu James Vanlalluaia, District Agriculture Officer (DAO) Champhai chuan DAO Office tualzawlah Ribbon chepchatin a hawng a ni.

Hawnna inkhawmah thusawiin Pu James Vanlalluaia chuan thlai thianghlim leh hrisel zawk thar thei tur chuan leitha leh thlai damdawi chemical fertilizer  State pawn atanga chawluh  kan hman loh a ngai a ni, a ti a. Organic Fair in a phochhuah tum ber chu thlai hrisel, leitha siam chawp leh rannung thahna hlo nilo atanga tharchhuahte chawilarna tur atan a ni, a ti a. Organic Farming chu Loneitute tana bung thar kaina anih thu a sawi a. DAO chuan kan nitin ei leh in atan phai lam atanga chawluh tam zawk kan ring a, tualchhung thar hrisel leh thianghlim neih a hlut thu a sawi a. Sawrkar laipuiin Organic Farming lamah nasa taka tan lain  Parampara Krishi Vikas Yojana a duanga, Organic hmanga thlai tharte chu a hrisela, a tuiin mi ten an hluta a man pawh a to zawk deuh thin a ni, a ti a. Organic thlaite chu enkawl hautak deuh mahse a hralhna lamah erawh harsatna a awm loh thu a sawi a. Loneitu kalkhawmte chu Organic Farming lama thanharh a, tu leh fate zirtira kawhhmuhtu nih  tum turin a chah a. Organic Fair kaltlanga mithiamte hnen atanga zirtirna an dawnte uluk taka ngaithla tur leh zawhna an neihte zawh hrehlo turin a fuih a. Organic Fair hlawkthlak taka hman anih theihnana duhsakna hlan chungin a hawng a ni.

Fair hawnna zawh hnu hian Organic Fair puala zirtirna Technical Seesion hi DAO Conference Hall-ah hman chhunzawm a ni a. He hunah hian PKVY Champhaia kalpuina kawnga Nodal Officer Pu V.L Buanga, Agricultur Extension Officer chuan PKVY chungchang a sawifiah a. Champhai District chhunga Cluster pangate chu India sawrkarin Organic Farming kalpui tura a pawm leh hmelhriatte an nih thu sawiin, rinawm leh taima taka tan la zel turin a fuih a. Engkimah sawrkara innghat mai loin mahni kutkawiha thawh hram hram tum turin a fuih a.  An kalzelna tur chu an mahni kutah a innghah thu leh thlai tharte hralhna lamah lungngaihna tur a awm loh thu a sawi bawk a ni.

He hunah hian zirtirna benglut tak takte ngaihthlak a ni a. Pu C.Lalhriatpuia, Project Director, ATMA Champhai hnen atangin Lei let phut lova Lei hnawnna vawnhim hmanga thlai chin dan ‘Zero Tillage and Mulching’ tih thupui hmanga zirtirna ngaihthlak a ni a. Hemi zawh hian Dr. Chinlampianga, Deputy Project Director, ATMA Champhai hnen atangin ‘Azola Cultivation’ tih leh ‘Pest Management’ tih thupui hmangtein zirtirna ngaihthlak a ni a. Pu Lalkima, AEO-in lawmthu sawna neiin hun a khar a ni.

PKVY hnuaiah hian Champhai District-ah Cluster 5,  Phaitha Kawng (Khawzawl), Phaisen Hnar (Khawzawl), Lungreh (Dungtlang), Saikah (Vanzau, Bungzung) leh Thangpui (Hnahlan, Vapar) te a awm a. Heng cluster 5 ahte hian Loneitu 50 theuh  awm zelin Loneitu hrang hrangte chuan Damdawi leh Fertilizer tello a an thlai tharte chu la khawmin he Fair-ah hian an entir a ni. Fair hawnna neih anih hnu hian Stall chhunga Organic thlai hrang hrang pholante a duh apiang ten an tlawh a, zawh duh an neihte an zawtfiah a. Loneitute tana   pawimawh tur ziahna lehkhabute a thlawnin sem a ni a. Organic thlai venhimna leh leitha te, Nature vel leh Changpat leh Bawng ek atanga Leitha (Compost leh Vermi Compost) siam te leh Model Farming Practices Tableu-te pawh he Fair-ah hian entir a ni a. Fair hi mi thahnem takin tlawhin an hlawkpui hle a ni.