India Sipai ten Pakistan sipai te an Hnehna Ni(Vijay Diwas) kumtin December ni 16 a kan hman thin chu sawrkarin a ruahhman angin  Mizoramah chuan vawiin khan hman a ni ta zawk a.  Vijay Diwas puala inkhawm chu War Memorial, Treasury Square-ah tukin zingkar khan neih a ni. He hunah hian ram tana nunhlan sipai hrang hrangte zahna pangpar thi te chu Sawrkar mi pawimawh, sipai hotute leh Ex- Servicemen   ten Martarte Thlan Lungah an dah a ni.

India sipai huaisen te zahna chibaibuk leh pangpar hlanna hunah hian Governor Kummanam Rajasekharan chuan hma hruaiin War Memorial-ah hian pangpar thi dahin Indona hmuna pasaltha te leh Martar te zahna chibai a buka. Hemi hnuah hian Chief Secretary Pu Arvind Ray, Home Principal Secretary Pu Lalrinliana Fanai, DGP Pu Balaji Srivastava, Brig Vinod S, SM, VSM, DIG, 23 sector, Assam Riffles, Aizawl District Bawrhsap Dr. A. Muthamma, Aizawl District SP Pu Brijendra Kumar Yadav leh mi pawimawh ten zahna lantirin pangpar an dah bawk a ni.

December ni 16, 1971 kum  khan Ramna Race Course tuna Suhrawardy Udyan ni ta, Dhaka khawpui, Bangladesh-ah India Sipai hotulian, Lt. Gen Jasgit Singh Aurora hnenah Pakistan General Amir Abdullah Khan Niazi leh a sipai 93, 000 te chu India laka tlawmin an inpe a ni. He hnehna pawimawh tak avang hian Bangladesh chuan Pakistan atangin zalenna a neih phah a. He Ni pawimawh tak hriatrengna atan hian kumtin Vijay Diwas hi India ram hmun tinah hman ziah a ni.