Vawiin khan Tourism Department buatsaih Winter Festival hawnna hun Tuirial Airfield ah a tum 2 nan hman a ni a, Mizoram Chief Secretary Pu Arvind Ray, IAS chu khuallian niin Tourism department Director Pu Biakthanmawia Pautu in hawnna hun hi a kaihruai.

Chief Secretary Pu Arvind Ray, IAS chuan Mizoram Tourism Department in kawng hrang hranga hma an lakna chu fakawm tiin Winter Festival 2018 hian Mizoram hi Zinmite thlen chakna hmunah a siam ngei a beisei thu a sawi bawk.

Pu Biakthanmawia, Director, Tourism Department chuan,” Mizoram mipuite intihhlimna atan leh ram pawn atanga zin mi tam zawkin Mizoram an luh chak phah theih nan Winter Festival hi buatsaih a ni,” a ti a, “Kan hnam ziarang, lam leh zai mawi tak te phochhuak a ram pawn zau zawk atanga zin mite kan hip luh deuh deuh theih nan tun Winter Festival a kan mikhual te pawh duat thiam in zo nun mawi  I pho chhuak zel ang u,” a ti bawk.

Winter Festival 2018 hi Decemeber 13, 14 leh 15 chhunga hman tur niin Tuirial Airfield ah hian intihhlimna hrang hrang chhawp chhuah a ni a, Food court, Hot air balloon, Zorbing, Archery, Powered Paratrike te awm in Painting, Orchid Exhibition te a awm bawk a, hnam lam leh zai te entir a ni bawk a ni. Winter Festival hawnna hun ah hian Tourism department hotute leh department dang atang in mi pawimawh hrang hrangten an tel pui a, mipui thahnem tak bakah ram pawn atangin zin mi enge maw zat chhimtu an awm bawk a ni.