No.3929/2020-2021

Nimin a Cabinet meeting in an lo rel tawh angin National Highway 54 siamthatna kal mek avanga lirthei tangkhang te, a khalhtute zing a Covid-19 kai hmuhchhuah chungchangte leh nitin mamawh (Essential Commodities) chawkluh kawng a harsatna awm thei thlithlai a, a tul anga ruahmanna siam turin Pu Lalchhhandama Ralte, Minister of State, Education Department, Pu Lalruatkima, Minister of State, I&PR leh Pu TJ Lalnuntluanga, Minister of State, Law & Judicial department te chuan a hmun ah kalin Kolasib district sawrkar hotute an kawm a, Vairengte checkgate te tlawhin Essential Commodities a harsatna awm lo turin ruahmanna an siampui.

Cabinet meeting kaltlanga Kolasib district chhung a lirthei tangkhang avanga harsatna thlithlaia, a tul anga hma la tur a kal Minister 3 te chuan lirthei tangkhang khalhtute leh handyman te endik hna chak zawk a kalpui zawh vat a nih theih nan Medical screening team dah belh a nih tur thu an sawi a, endikna hmanrua a tul angte pawh a rang thei ang ber a pek an nih tur thu an sawi bawk a ni. Kolasib district DC leh thawktu dang te kawmin, ram pawn atanga lirthei lo lutte chu a khat tawk a endikna kalpui thin chu thawktute dah belh a lirthei lo lut zawng zawngte endik tawh tur a hmalak a nih thu te, ruahmanna anga kalpui a nih chuan nitin mamawh chawkluhna kawngah mipui tan harsatna awm lo tur a ngaih a nih thu te, lirthei khalhtute endik hna pawh tha tak a Police-te enpuina hnuai a kalpui a nih avangin mipui tan chiaina tur a awm loh thu sawi lan a ni. Lirthei khalhtu leh handyman, Covid-19 kai hmuhchhuah te chu Polytechnic, Thingdawlah khunghran nghal zel an nih avangin, an lirtheite chu kawnga hnuchhiah mai lovin, a neitute senghawi tur a tih a ni a. Lirthei neitute hriattir an nih hnuah Phone number 8974205531 ah inhriattir zel tur a ni ang. 

Kolasib leh Vairengte a lirthei tangkhang khalhtute endik a kal Minister te chuan hripui lak a mipui himna Sawrkarin a ngaih pawimawh ang bawkin eitur mamawh ang mipuiin an hmu lo ang tih an venthawn tel thu an sawi a. Tun a lirthei awm te endik hna kalpui chhung hian nitin mamawh phur lirtheite chu an luh chhunzawm tur thu leh, endikna kalpui zawh ah Non- Essential Commodities phur te pawh lut chhunzawm thuai thei tur a ruahmanna siam a nih thu an tarlang bawk a ni. Vairengte Screening point a Covid-19 endikna bik buaipui tur Doctor mamawh thu thawktuten an lo thlen angin, Dr R Lalthangliana, Health Minister hnen a thlen nghal a ni a, a rang thei ang ber a doctor dah a nih theih nan hmalak a nih tur thu a lo hrilh bawk a ni. Khawtlang hruaitute a kawmnaah I&PR Minister Pu Lalruatkima chuan Mini RT-PCR, Kolasib ami tur pawh chah tawh a ni a, reilote chhungin Kolasib district mipui leh Screening point a sample endik nan tangkai tak a hman a nih thuai a beisei thu a sawi.

Kolasib leh Vairengte inkar kawng a motor tangkhang khalhtute leh handyman-te harsatna ngaithla in, eitur an mamawhte chu Sawrkarin, DC Kolasib kaltlangin, YMA te nen a tul anga ngaihtuahpui an nih tur thu an hrilh a. Tun a lirthei tangkhang mek zingah, LPG leh Oil phur te chu ngaih pawimawh ah neih a, endik hmasak a, test paltlang te chu kaltlang tir hmasak tur a ruahman a ni.

Vairengte Screening point leh Jt YMA, Vairengte duty-na hmun te an tlawh a, thawktute inpekna leh thawhrimnaah lawmthu sawiin hripui lak a ram venhim kawng a hna pawimawh tak thawktute harsatna leh mamawh hriatpui chu Sawrkar tih tur a nih thu te leh a tul ang a hma chak tak a lak a nih tur thu an hrilh a ni.

Attachment

  • Loading attachment...