No.3930/2020-2021 


Aizawl the 8th August, 2020: COVID-19 hrileng avanga inter-state border a lirthei khuahkhirh kaihhnawih ah mipui nitin mamawh (essential commodities) dinhmun chungchangah vawiin khan FCS&CA Director Dr. Lalhriatzuali Ralte hovin FCS&CA Conference Hall-ah emergency meeting neih a ni a. Thil man to uchuak a zawrh a awm loh nan price control lamah theihtawpa hmalak an rel.


Meeting-ah hian essential commodities hrang hrang dinhmun ngaihthlak niin, buhfai ah chuan ZIDCO report atangin tun dinhmunah mipui tan harsatna awm rihlo tura ngaih a ni a. Supply Godown lamah OMP buhfai a thahnem deuh avangin unload na tur a awm rihlo a, hei avang hian buhfai hi an la phur rihlo a ni. Ei rawngbawlna gas LPG hi Plant atanga LPG load phur truck 70 chu an agency la thleng lo an awm a, an lo thlen thuai theih nan hmalak tum a ni. MIDA chuan tun dinhmuna an bungraw neih sa pawhin chawlhkar hnih vel chu mipui mamawh a la phuhru thei tho tura an ngaih thu he meeting-ah hian an sawi.


COVID-19 avanga thil man uchuak taka lo chhiar an awm loh nan a tam thei ang bera mipui leh dawrkai te hnenah fimkhur tura inhrilhhriat a, mipuiin dawrkai zinga diklo taka thil man lo chhiar to uchuak an hriat chuan Legal Metreology hnenah report zel turin vawiin thutkhawm chuan a rel a ni.


Essential items phur driver te chu kawng laka thil lei mai mai a him loh avangin an mahni tla tur ration pai tura hrilh hriat nawn ni se tiin vawiin thutkhawmah hian sawi a ni a. Driver/handleman zinga COVID-19 positive hmuhchhuah, enkawlna hmuna dahluh tawhte chu an lirthei leh bungraw kalsan chungchangah IOC lamin transporter te be pawpin a tul angin hma la tura ruahmanna siamin, district thuneitute leh DM&R department lamah kal zel dan tur thlen ni se tia rel a ni bawk.


Essential items 26 bakah chini, packaged water, spices (hmuihmer), purun var, damlote ei tur bik food supplements, bakery leh confectionery items te chu telh belh nise tiin rel a ni bawk.


Vairengte a truck rawn khalhtute leh puibawmtute chu sawrkar ruahmanna anga COVID-19 test tih sak an nih hnu a an zinga positive an lo awm palh chuan a thlaktu tur IOC hnuaia transporter ten an ngaihtuah tura ngaih a ni a. Thlak tur an lo awm remchanglo palh a nih pawhin Mizo driver zingah Explosive License nei pawh an awm theih tur thu vawiin meeting-ah hian ngaihthlak a ni. IOC lam pawhin an depot a load la tura kal te chu covid test neih tir zel tura hmalak a nih theih nan leh load lakna hmunah hian inchiahpiah lo a, him zawka kalpui a nih theih ruahmanna siamin sawrkar ah thlen rel a ni bawk.