3240/2022-2023
Dated Serchhip, the 13th January, 2023: Vawiin khan Little Flower Convent School, Serchhip te chuan Cultural Day, 2023 Serchhip Sports Stadium ah an hmang a. Pu Lalduhoma, bialtu MLA chu khuallian niin, Pi Nazuk Kumar, IAS, DC chu khualzahawm a ni.

He hunah hian khuallian chuan, Mizorama School tha pawl Little Flower Convent School, Serchhipah, ka bial chhungah kan nei hi lawmawm ka ti a, Serchhip mipuite kan vannei hle a ni. Hetiang school tha min din saktu Roman Catholic kohhran leh Management Board te chungah lawmthu ka sawi a, kan Sister leh a thawhpuite inpekna sanzia pawh a hmuh theiha, a hlu tak zet a, hmasawn zel turin duhsakna ka hlan a ni. Ram changkang apiangah zirna leh hriselna lama hmalaknain ngaihpawimawh a hlawh a, kan ram pawhin hei hi kan mamawh em em anih avangin hmalam pan zel kan ngai a, kei pawhin ka theih angin MLA Fund atang tein hma ka la thin a ni, a ti a. He School in Auditorium an sak meka hman atan MLA Fund cheng nuai thum a pe a ni.

Khualzahawm Pi Nazuk Kumar pawhin thusawiin, Little Flower Convent School ten an Cultural Day a an sawm avangin lawmthu a sawi a. Kum 1976 a din Little Flower Convent School chu vawiinah chuan kan district a School tha ber te zinga mi a lo ni ta a, kan ram leh Serchhip district tan a hlu em em a ni. Kan hriat vek angin zirna hi classroom leh lehkhabuah chauh a innghat thiang lova, kan naupangte hi nunkawng leh hriatna dang tam tak kan hlanchhawn a tul a ni. Chung kan hlanchhawn tur zinga pawimawh tak pakhat chu kan hnamziarang leh kan thu leh hla hluite an ni. Cultural Day hian chutiang lama hmasawnna nasa tak kan fateah a thlen dawn avangin a lawmawm hle a ni, a ti a. Naupang zual deuhte zirtirna kawngah Playway method hman uar deuh deuh tul a tih thu a tarlang bawk.

He hunah hian Rev. Sister Florence Lalrinpuii’n hunserh hmangin, Sister Wilma, Headmistress in kalkhawmte lawmna thu a sawi a. Zirlai naupangten Costume Parade, Mizo infiam chi hrang hrang, Tlanglam, Chai, Chawnglaizawn, Siktuithiang lam, Sarlamkai leh Cheraw te bakah Folk Song leh Drama hmuhnawm tak tak an entir a ni.

Little Flower Convent School ah hian Kindergarten atanga Class VIII thleng awmin kumin Academic Session ah hian zirlai 942 leh zirtirtu 30 an awm mek a ni.