Mizoram Chief Minister Pu Lal Thanhawla Nu (Lalsawmliani) leh a Unaupa (Lalthanchunga) te hriatrengna atana Serchhip District Football Association buatsaih “14^th L&L Football Tournament” Final chu vawiin khan Khawtetlang Field, New Serchhip ah 1^st Bn MAP Academy leh Ramhlun North Football Club , Aizawl ten an khel a, Chief Minister Pu Lal Thanhawla chuan a hmuna kalin inkhel hi a en a ni.

Final ṭan anih hmaa inkhawm tawite buatsaihah Chief Minister Pu Lal Thanhawla chuan thu sawiin ṭhalaite tan kawng hrang hrangah khawvel thar an buatsaih mek a, sum harsatna vangin duh angin hma la chak theilo mahse Sawrkarin theihtawp a chhuah reng a ni a ti a, infiamna bakah kawng dang dang pawh a dap reng a, sipaia Mizo ṭhalaite an luh theih nan pawh nasa takin hma an lak thu leh nikum chhung ringawt pawh khan Mizo ṭhalai sang rual sipaia an ṭan thu a sawi. Chief Minister chuan ṭhalaite chu hnam rohlu an ni a, thuawihna leh insumtheihna an tlakchham erawh chuan ram leh hnam tan mi hnawksak an ni thei tih inhria a rilru nei taka awm a, ram leh hnam tihmingṭhatu ni turin a fuih a ni. Khawtetlang khelmual pawh ‘phul lem’ phah anih theih nan Sawrkar Laipui a Sports Ministry nawr mek anih thu a sawi bawk a ni.

“L&L Tournament” hi Chief Minister Pu Lal Thanhawla te chhungkaw sponsor niin kumin hi a vawi 14 na a ni a, November ni 6, 2014 aṭanga khelh ṭan niin tun tumah hian Mizoram chhung hmun hrang hrang aṭangin team 23 an tel a, a tirah Group 8-ah ṭhen an ni a, Group tina a sang pahnih ṭheuhin Round of 16 lutin an inthlifim chho zel a. Vawiina Final hi 1^st Bn MAP Academy leh Ramhlun North FC ten khelin hun pangaia goal a luh loh avangin Extra time khelh a ni a, hun pek belh tawp thlenga goal a awm loh avangin a tawpah penalty shootout hmangin Ramhlun North FC te hian 6-5 in hnehna an chang ta a ni.

Chief Minister hi LAD Minister Pu PC Lalthanliana, Pu PC Lawmsanga, IPS, Principal Secretary, DM&R leh Pu L.R. Dingliana Sailo, MPS, Commandant, 1^st Bn MAP ten an ṭawiawm a ni.