No.384/2021-2022

Aizawl the 3rd May, 2021 : Mizoram chhunga hrileng (COVID-19) kai thar kan lo pun tak zel vangin State Disaster Management Authority, Mizoram-in in khuahkhirhna thupek No.B.13021/101/2020-DMR/Vol-IV Dt. 1.5.2021 in thupek a chhuah angin a hnuaia mi hi LLTF/VLTF tin te’n khauh takin an kengkawh tur a ni.

1. LLTF/VLTF ten an mahni veng/khaw bila in kharkhip leh khualzin luh phal loh an puang thiang lova, tul bik thilah an mahni bialtu Incident Commander/Executive Magistrate te hriattir hmasak tur a ni.

2. State pawn atanga rawn haw, screening point a negative result nei mahse Home Quarantine tura tih te reng reng chu sawrkarin ruahmanna a siam Ni 10 (Sawm) chhung an in khung hrang ngei ngei tur a ni. VLTF/LLTF te’n anmahni veng/khaw chhungah uluk takin an endik (monitor) tur a ni.

3. VLTF/LLTF te’n Mizoram pawn atanga rawn haw te reng reng anmahni bialtu Incident Commander/Executive Magistrate te an hriattir tur a ni a, hei hi kan hri do mek laka mipui an him tlan theihna tura ruahhman a ni a. Tin, mahni ina inkhunghranna (Home Isolation) nei te chu endik hmasa in, bedroom/inthiarna hranpa an nei ngei ngei tur a ni a, chumi nei lo te chu CQF/GQF/Paid quarantine emaw an chhungkua a quarantine tur an ni ang. LLTF/VLTF te’n uluk takin mahni inkhunghrang (Home Isolation) an endik/vil tur a ni.

4. VLTF/LLTF ten chhuah phalna pekah chhuah ni (date) chhuah na chhan (reason) kal na tur veng (place) leh phal hun chhung hun bi (time) ziah lan zel tur a ni.

5. District Magistrate in Curfew Order vide No. J.25012/14/2020-DC(A) dt 2.5.2021(Sunday) a chhuah angin ‘Curfew’ hun zan dar 7:00 atanga zing dar 4:00 inkar hun chhung hian District Magistrate/SDO (S), Aizawl District in chhuah phalna a pek te bak chu VLTF/LLTF te’n Medical Emergency leh chhiattawh thila veng danga kal ngaite tan chauh uluk leh fimkhur takin pass an pe chhuak tur a ni.

6. VLTF/LLTF te’n hri do mek kan ni tih hriain tul tak meuh meuh lovah chauh lo chuan chhuah phalna hi Curfew hunchhung emaw/Curfew hun pawn lamah pawh fimkhur thei ang berin an pe chhuak tur a ni a. Tin, kawngpuia infiam/inkhelh/intihhlim/exercise la tura mahni compound chhuahsan te hi phal a nilo a, he inkhuahkhirh hun chhung hian mahni veng/khaw tinah VLTF/LLTF te’n khawng takin hma an lo la tur a ni.

7. Hmunkhata mipui pungkhawm tur ven nan Dawr/Thlai leh nitin mamawh zawrhna dawr hrang hrang te mipuiin awlsam zawk a kan lei theih nan Thawhtanni, Nilaini leh Zirtawpni ah te hawn tur a ni ang.

8. Mahni eizawnna kaihhnawih ni lemlo lui kal/ramhnuaia picnic/intihhlim, hiking leh adventure sports activities hrang hrang te hi khap tlat a ni a. VLTF/LLTF te’n hetiang ang ti lui hram anmahni khaw/veng chhungah an awm a nih chuan a rang thei ang berin anmahni bialtu Incident Commander/Executive Magistrate te hriattir nghal vat tur a ni.

9. Sawrkar-in Lockdown kaihhruaina a exemption a pekte zingah pawh an nihna tichiang theitu ID Card neilo te chu an nihna leh tihtur ti chiang turin LLTF/VLTF te’n lehkha lo siamsak thin tur a ni. Phalna pek kher ngai lova hna thawh theih thawktu tur pawh kalkawngah harsatna a tawh loh nan LLTF/VLTF te’n lehkha pek zel nise.

10. Home Quarantine leh Home Isolation-na tur an nei a nih phawt chuan LLTF/VLTF te’n phalsak vek tur a ni a. An neih theih dan ngaihtuahpui hram zawk tur a ni.

11. He kan hri do mek hi mahni maia hneh chi a nih loh avangin kan tanrualna leh kan intawiawmna a pawimawh takzet a. Tin, inkhuahkhirh hun chhung hian Sawrkarin Duty tura a ruat bik (Executive Duty) te tha ti chak leh zual turin leh an hmalaknate lo tawiawm zel turin VLTF/LLTF tin te ngen leh beisei vek kan ni.