No.385/2021-2022

Lunglei the 3rd May, 2021 - Covid-19 hrileng laka him tlanna tura Mizoram sawrkarin inkhuahkhirhna thupek (dated 01.05.2021) 03.05.2021 atanga 11.05.2021 chhunga zawm tur a siam bawhzuiin vawiin tlai khan Lunglei DC Pu Kulothungan A kaihhruaiin Convention Centre, Lungleiah DLTF member-te leh town area VLTF hruaituten meeting neiin he thupek zirchianna leh a kenkawh dan tur kawnga inrawnkhawmna hun an hmang. 

Bawrhsap leh District Level Task Force on Covid-19 Chairman ni bawk Pu Kulothungan A chuan Covid-19 hrilengin kiam lam pan lova zual lam a pan zel avangin kan himna tura sawrkarin dan zawm tur a duante zawm hram hram turin Lunglei District mipuite a ngen a. He Inkhuahkhirna hi mumal taka kalpui a nih theihnan veng hrang hrang ten kalphung inang tlanga thupek an kenkawh a tul thu a sawi bawk. 

Meeting-ah hian DLTF member ten Covid-19 inkhuahkhirhna kawnga an Department hmalakna te sawi zauna hun an hmang a. Lunglei SP Pu Rex Zarzoliana Vanchhawng chuan Inkhuahkhirna thupek kengkawhin Lunglei Police-te ngawrh taka duty an kalpui mek thu tarlangin shift hnih (2) – chhun leh zanah duty kalpuiin Lunglei khawpui chhung lun lai hmun nga (5) ah an duty thu a report a. Hemi bakah hian police flying squad ten Lunglei khawpui leh a chhehvelah 24 hours patrolling an kalpui bawk a ni. Veng hrang hrangin inkharkhip chhunga an venga police duty an ngenna chu a tul anga bawhzui a nih tur thu Lunglei SP chuan a sawi a ni.

Lunglei Medical Superintendent Dr SR Ngurchamliana chuan Lunglei District Oxygen dinhmun a that thu leh Civil Hospital-a Oxygen Khawlpui (Oxygen Generating Plant),boruak atanga Oxygen siam chhuak thei, a chak zawng 200 litre/minute chu a functional a, hman mek a nih thu a report a. He Oxygen Khawlpui atang hian pipe hmangin hospital ward-ah te Oxygen hi pek chhuah theih a ni. Cylinder-a oxygen awmsa sem darh tu khawl pawh engemawzat Lunglei Civil Hospital-in a neih thu a tarlang. Hemi bakah hian Oxygen Refilling and Distribution Centre pawh Lunglei District tan siam tum a nih thu a sawi a ni.

Lunglei CMO Dr LC Liana chuan tun hnai maia Lunglei District Tlabung khuaa Covid-19 positive mi 30 chuang hmuhchhuah an nih avangin Contact Tracing pawh ngawrh taka kalpui mek a nih thu a report a. Tun dinhmunah Lunglei District-ah random testing kalpui tum a nih rih loh thu sawiin hemi chungchangah hian H&FW Department hotute nen inrawn chunga ruahmanna an la neih theih a beisei thu a tarlang bawk.

Tun dinhmunah Lunglei CCC – SIRD Pukpuiah mi 26 enkawl mek niin Tlabung CCC – Tourist Lodge ah mi 25 enkawl mek an ni a. Home quarantine mek mi 79 awmin 2^nd Battalion MAP mi leh sa in quarantine mek mi 41 leh 199 BSF Zotlang quarantine mek mi 36 an awm a ni. 01/05/2021 khan Lunglei DC chuan Tlabung Missionary kai atanga Bazar Shed,a dung metre 250, a vang metre 100 chu containment area-ah a lo puang tawh a ni. He Containment Area chhungah hian Deputy Commsioner-in phalna a pek te, Medical Duty, Security Duty, helai hmuna duty pawimawh nei tura ruatte bak tumah an lutin an chhuak tur a ni lo.

Covid-19 Hri danna pek chhuah chu Nationwide Vaccination Drive 16th January, 2021-a bultan ruala Mizoramah pawh pek chhuah tan niin 01/05/2021 thleng khan Mizoram pumah vaccine dose 2,55,107 pek chhuah tawh niin First Dose la tawha second dose la hmabak mi 2,09,089 awmin, 1st dose leh 2nd dose la kim tawh mi 46,018 an awm a. Lunglei H&FW Department chuan Lunglei District leh Hnahthial District-ah dose 36,787 an pe chhuak tawh a ni

Inkhuahkhirhna thupek hi Lunglei District-ah tha taka kalpui a nih theihnan Lunglei District-ah Executive Magistrate/Incident Commander pasarih ruat niin heng Magistrate-te hian an bial chhunga VLTF-te ruahmanna an siampui a ni.