482/2023-2024

Aizawl, 17.05.2023: Chief Minister Pu Zoramthanga chu vawiin chawhnu khan a pisa ah Lunglei Municipal Council a Councillor thlan thar te chuan hmu in an inkawm.

Chief Minister chuan LMC Councillor te chu a lawmpuina thu sawiin, an hmabak ah duhsakna sang tak a hlan a. Sawrkar laipui in inrelbawlna semzai, decentralization a uar zel ang bawkin Mizoramah pawh Aizawl ah bultanin, tunah Lungleiah Municipal Council din a nih leh thu a sawi a. Councillor thlan thar te chu tunah chuan thil thar vek hmachhawn tur ni mahse inzir chho zelin, mawhphurna tak tak lak hunah chuan hlimawm an tih ngei a rin thu a sawi a.

Chief Minister chuan hmalak hona ah mawhphurhna insem a niin a tha in mi zawng zawng a daih sen vek loh chang a awm thin a, chungah chuan ngui mai lova mahni ko a tla chu thahnemngai taka thawh zel a pawimawh thu leh, hruaitu tha ni tur chuan zuitu tha nih a pawimawh thu te chu an career atan hre reng turin councillor tharte chu a chah a. Bultan thar tur an nih angin mamawh an neih ah pawh inthlahrung lo turin Chief Minister chuan a hrilh a, a remchan dan ang zela sawrkar in a puih tur thu a sawi a. Councillor thar te chu Lunglei leh a chhevel tan hmasawnna tha thlentu an nih ngei a beisei tlat thu a sawi a ni.

LMC Councillor te chuan Chief Minister hnenah hian mamawh an neih thenkhatte thlen in inkawmna hun tha tak an nei a ni.

Nimin khan Deputy Chief Minister kawmin UD&PA Directorate an tlawh bawk a, naktuk hian AMC an tlawh leh dawn a ni.

Attachment

  • Loading attachment...