3995/2022-2023

Lunglei the 27th March, 2023 – March ni 29, 2023 a neih tur 1st General Election to Lunglei Municipal Council-a Polling Party-te duty na hmun tur pawh na ‘3rd Randomization of Polling Officials’ chu vawiin khan Lunglei DC Conference Hall-ah District Municipal Election Officer Pi Ramdinliani, IAS hovin neih a ni. He hunah hian Municipal Returning Officer Pu Donny Lalruatsanga, Election Observer Dr Lalngura Tlau, Election Officer Pi C. Lalduhzuali leh official dangte bakah party aiawhte an tel a ni.

District Municipal Election Officer Pi Ramdinliani chuan LMC Election 2023 inpuahchahna chu tluang taka a kal zel thu sawiin hlawhtling taka zawhfel ngei anih theihna turin mawhphurna chelhtu official-te leh party aiawhte chu theihtawp chhuah chhunzawm turin a chah a. State Election Commission thupek angin political party hrang hrang te'n campaign hi March ni 27, Thawhtanni tlai dar 4 thleng an nei thei a. Hemi hnuah hian campaign phal a ni tawh lova, Lunglei khaw pawn atanga campaign tura rawn kal, Lungleia vote nei silo te pawh an cham a rem tawh loh bakah door to door campaign pawh phal a ni tawhlo ani tiin Lunglei DMEO chuan political party-te chu he thupek hi zawm ngei turin a chah nawn leh a ni.

1st General Election to LMC a duty tur hian Polling Party 55 siam fel tawh niin training pawh an zo tawh a. Vawiin 3rd Randomization-ah hian Polling Station 44-a duty tur Polling Party 44-te leh Reserve-a dah tur Polling Party 11-te thlan fel an ni a. Duty tur te hi pawh fuh hmangin political party aiawhten an pawt a ni. Polling party-te duty na tur hi tun dinmunah anmahni la hriattir emaw puanzar ala ni lova. Naktuk chawhnu dar 1 ah Lunglei DC Office atangin Despatch of Polling Parties neih a ni dawn a, hemi hunah hian Polling Party 44-te duty na hmun tur hriattir tur niin an Polling Station an pan nghal tawh dawn a ni. Reserve Polling parties 11-te hi a tul anga duty tura koh reng theih turin Poll Day ah DC Office ah an awm dawn a ni.

Lunglei Municipal Council Inthlanna ah hian October ni 14, 2022-a tlangzarh Lunglei Municipal Council Final Electoral Roll chu hman a ni dawn a. Electoral Roll ah hian vote nei mi 40,548 awmin mipa elector 19,123 leh hmeichhe elector 21,245 te an awm a ni. Electoral roll ah hian October 1, 2022-a kum 18 tling chin thun tur a nih angin chutianga buatsaih chu a ni a, ennawn a ni tawh lo a ni. Chuvangin October 1, 2022 hnu lama kum tling tharte chu LMC electoral roll ah hian an chuang lo a ni.