1173/2024-2025

2024 Vawkhniahzawn thla ni 12: Vawiin khan Lunglei Traffic & Transport Coordination Committee (TTCC) chu Lunglei Municipal Council (LMC) Vice Chairman Pu K. Lalrinawma hovin a office chamber-ah an ṭhu khawm.

LMC Vice Chairman Pu K. Lalrinawma chuan member kal khawmte lawmna thu sawiin, Lunglei khawpuiah lirthei tlan dan leh hun dan chungchangah mipui tana him leh zangkhai mai piah lamah, khawpui hmel timawi tur zawnga ruahmanna felfai tak a awm theih nan theih tawp chhuaha hma an lak mek thu a sawi a. Khawpui faina leh thianghlimna atana bawlhhlawh paih leh sawngbawl chungchangah pawh ruahmanna a kal chho mek tih sawiin, mipui tana thil ṭha zawk a awm theih nana insingsak hun lai a nih avangin an hma lakna leh ruahmannate ngaichang a, ṭha taka thlawp turin Lunglei mipuite chu a ngen a ni.

He ṭhut khawmah hian LMC Executive Councillor Pu Zorinsanga Hmar, Ward IV Councillor Pu R. Lalramzauva leh Chief Executive Officer Pu Donny Lalruatsanga te bakah, member dang - SP Lunglei, SE PWD ai awh AE, DTO Lunglei, DIPRO Lunglei, Traffic O/C, District MJA Vice President leh Sub-Headquarters YMA President te an tel a. Two wheeler taxi, auto rickshaw leh maxi cab stand ruahmanna chungchanga dilna leh rawtna lut te, office tana parking siamsak tura ngenna te, pik up stand tur ruahman dan tur leh khawpui chhunga lirthei lian tlan luh hunbi ruahman kaihhnawiha dilna lut te thlir ho a ni a. Ṭhut khawma sawi fel nghal theih chin rel fel niin, a hmuna en hmasak ngai ang chi chu LMC leh Police/Traffic lamte nen enfiah hnua ruahmanna siam ni se, tih a ni a. Lunglei khawpui chhunga lirthei tlan dan leh hun dan felfai leh ṭha zawk a awm theih nana hmathlir te sawi ho a ni bawk.

He ṭhut khawmah hian Lunglei District Transport Office-in kum kal taa Lunglei khawpui chhunga parking fee khawn tur tender an chhuah chhanna aṭanga sum lut ₹ 2,30,000/- chu LMC-ah an chhun luh thu leh hemi aṭang hian Lunglei khawpui traffic enkawl nan Traffic Police kutah ₹ nuai 1 hlan chhawn a nih thu tar lan a ni bawk.