1172/2024-2025
2024 Vawkhniahzawn thla ni 12: Vawiin khan Lunglei District Information & Public Relations Officer thar Pu C. Lalhruaitluanga chuan a office chamber-ah Mizoram Journalists' Association (MJA), Lunglei District member-te leh Akashvani Lungleia Aaj Subah News Presenter-te nen inhmelhriat nana thingpui in hona leh inkawm hona hun a buatsaih.
Lunglei DIPRO thar Pu C. Lalhruaitluanga chuan Lunglei chu district lian leh programme pawimawh tamna a nih angin duty chhuahna tur pawh a tam hle dawn nia a hriat thu sawiin, chanchinbu mite thawhpuina a mamawh dawn hle tih a sawi a. District thara thawk tur a nih angin kawng tinrengah amah fin chhuaha thurawn pe thin tur te, DIPRO office chu an office a ni tih hriaa chuang kai fo tur leh mamawh an neihte pawh lam hreh lo tur tea sawmin, office-in mamawh an neihte leh an tlak balna laiah pawh a theih ang anga hma lakpui ṭhin turin a ngen a, thu thar lak khawm chungchangah pawh thawktute indaih loh chang a awm pawha peizawn ṭhin turin a ngen bawk.
Pu C. Lalhruaitluanga chuan chanchinbu chhuah ṭhat a pawimawh thu sawiin, sawrkar advertisement pek chungchangah tehfung pawimawh tak a nih bakah, chanchinbu mi hming pu chunga chanchinbu chhuah mumal lo nih chu a inhmeh lo hle tih a sawi a. Thu thar theh darh leh puan chhuah kawngah thu dik, rin tlak leh belh chian dawl chauh chhuah ṭhin tur te, politic-a awn lam nei lo leh thu lai la taka thu chhuah ṭhin tur tea chahin, sawrkar thawhpui thiam a, sawrkar thu chhuakte ṭha taka puangzar ṭhin turin a ngen a. An thu chhuah leh puanzar reng reng chu a tam thei ang ber mipuite tana ṭangkai ni thei se ṭha a tih thu te, social media chi hrang hrang kal tlanga thu dik tawk lo theh darh awm ṭhin veng theitu ber an nih anga theih tawp chhuah tur leh an thu chhuah leh an thu puan hmanga mipuite hnena ṭawngkauchheh leh ziak dan dik zirtir theitu an nih inhre chunga ṭan la zel turin a chah a ni.
He hunah hian MJA Lunglei District President Pu Laltlanthanga pawhin thu sawiin, DIPRO tharin a hun hmasa lama chanchinbu mite nena inkawmna hun a buatsaih chu lawmawm a tih thu leh Lungleiin DIPRO ṭha tak tak leh fel tak tak an neih ṭhin avanga vannei an intih thu a sawi a. District MJA te chuan an theihna zawn apiangah DIPRO leh a thawhpuite chu puihbawm leh thawhpui an inhuam reng thu sawiin, District tan ṭha tak an thawh ho chhoh zel a beisei thu a sawi.
He huna tel member hrang hrangte pawhin DIPRO thar lawmna thu leh thawh hona ṭha zawk neih dan tur te sawiin, Lunglei District mipuite tana awmze nei leh ṭangkai zawka thawh ho dan tur kawng hrang hrang an sawi ho a. District MJA Vice President Pu Pc. Lalduhthlanga'n ṭawngṭaiin hun a khar a. Inhmelhriatna thingpui in ho nghal a ni.
Tun dinhmunah Lunglei District-ah hian MJA member 20 awmin, sawrkarin accreditation a pek accredited journalist 19 an awm a. MJA member-te hi print media leh electronic media lama inhmang ni hlawmin, tunah hian Lunglei District chhungah MJA member-te enkawl chanchinbu chhuak 13 a awm mek a ni.
Attachment
- Loading attachment...
