88/2026-2027

Lunglei, 2026 Ṭau thla ni 8: Lunglei Municipal Council (LMC) Vice Chairman Pu K. Lalrinawma leh Mizoram Journalists' Association (MJA) Lunglei District member-te chuan vawiin khan Civil Hospital Lunglei tlawhin, Civil Hospital Lungleia hmasawnna thar awm hrang hrangte a hmunah an enfiah.

Pu K. Lalrinawma hi LMC Ward No. 8-na Councillor Pi Malsawmkimi Khawlhring chuan ṭawiawmin, MJA Lunglei District member-te hi an President Pu H. Lalthansanga'n a ho bawk a. Civil Hospital Lungleia Senior Medical Superintendent Dr Laldinmawii leh a thawhpuite'n lo dawngsawngin, damdawi in hmunhmate an lo fanpui a ni.

LMC Vice Chairman leh MJA Lunglei District member-te hian Civil Hospital Lungleia cheng nuai 62.50 (₹62,50,000/-) senga hriselna lam endikna leh inenkawlna hmanraw dah tharte enin, Dr David Lalsangliana chuan hmanruate leh a thawh theihte a lo hrilhfiah.

Dr David Lalsangliana chuan Civil Hospital Lungleiah tun hma lama an tih theih loh, thisen zam chat avanga kawchhunga thi put (internal bleeding) awm tihrehna (bending tihna) ṭha tak an neih tawh thu sawiin, nikuma an hman ṭan aṭangin mi 44 bending an tihsak tawh thu a sawi a. Pumpui ṭhuah faina leh tui siak chhuahna te, naupang tan bika hman tur pumpui leh chawkawng enna bakah, pum chhung aṭanga thil dawlh palh lak chhuahna thlengin hmanrua an neih tawh thu a sawi.

Thawktute chuan Civil Hospital Lungleia tun hmaa an tih theih loh, Biopsy lakna hmanrua pawh a awm tawh thu sawiin, Laboratory-a test erawh an la tih theih loh thu an sawi a. An hmanraw neih tharte chu ṭangkai taka hman a nih thu an sawi.

LMC Vice Chairman Pu K. Lalrinawma leh MJA hruaitute chuan Civil Hospital Lungleia Intensive Care Unit (ICU), khum pathum awmna pawh a hmunah tlawhin an en nghal a. Civil Hospital Lungleia Oxygen Plant pawh enin, COVID-19 hri len laia Oxygen Plant bun thar, tun dinhmuna hman theih lohva awm mek chu siam ṭhat thuai ṭul an tih thu an sawi.

LMC Vice Chairman chuan Health & Family Welfare Minister Pi Lalrinpuii'n Mizorama Health Care Facility ṭha zawk neih chu a vei thu leh a hma lakna zarah hmasawnna tam tak hmuh a nih thu sawiin, Mizoram sawrkar zara Civil Hospital Lungleia thil thar leh hmel thar tam tak hmuh a ni leh tun hmaa hmun hla zawk pan ngaihna ang tam takah Civil Hospital Lungleiin mipui mamawh a phuhru thei ta chu lawmawm a tih thu a sawi a. Senior Medical Superintendent Dr Laldinmawii leh thawktute pawh fakin, an ṭhahnem ngaihna leh inpekna avanga damdawi in hmelhmang leh faina kawngah te, hmanraw ṭha zawk neih kawngah te danglamna leh hmasawnna tam tak a awm chu lawmawm a tih thu a sawi bawk.