89/2026-2027

Lawngtlai, 8th April 2026: Vawiin chawhnu khan Lawngtlai Bawrhsap Pu Donny Lalruatsanga chuan Lawngtlai khawpui chhunga damdawi In te a hmunah kalin a tlawh a, mamawh an neih hrang hrangte a enfiah a ni.

Pu Donny Lalruatsanga chuan District Hospital, Lawngtlai tlawh hmasa berin thawktuten an lo dawngsawng a. Damlo enkawlnaa an thawh kawngah fakin, thahnem ngai taka thawk zel turin a fuih a. District Hospital chu mi chanhai zawkten an pan nasa tih tarlangin, duat taka lo chiauau leh  enkawl turin a chah a ni. Bawrhsap chuan Civil Hospital tan motor pek an nih tur thu sawiin, tangkai taka hman a nih a beisei thu a tarlang a ni. Bawrhsap chuan MUCHS 2.0 bikah uar zawka inzirtirna ( Awareness) kalpui a tul hle tih sawiin, a hma lamah Awareness Campaign' neih a nih tur thu a sawi a ni.

Civil Hospital - a Doctor - te hian mamawh an neih hrang hrang- quarters, incenarator, Doctor Indian lohna,  Dialysis bik khawih tur  doctor , X- ray room lian zawk leh thildangte bawrhsap hnenah hian an lo  thlen a. Bawrhsap chuan theih ang anga an mamawh zualpui phuhruk tura hmalak a nih tur thu a sawi a ni.

Christian Hospital Lawngtlai tlawhin, Medical Superintendent leh thawktuten an lo dawngsawng a. Hospital - in mamawh hrang hrang an neih- medical equipments, Tuidahna (Tanky), leh a dangte bawrhsap hnenah hian an lo thlen a. Bawrhsap chuan ziaka thlehlut tura chahin, a theih ang anga bawhzui a  tum thu a sawi a ni.

Lairam Christian Medical Centre & Hospital (LCMC&H) tlawhin Medical Superintendent leh thawktuten an lo dawngsawng a. Hospital - in mamawh an neih hrang hrang- Ultrasound, Computer set, leh a dangte an lo thlen a. Bawrhsap chuan 'LCMC& H'  in Nursing School - an din tur chu phurawm a tih thu sawiin, Chhimbial mai bakah hmun dang atanga zir duh tan a tangkai dawn hle a ni, a ti. Pu Donny Lalruatsanga chuan LCMC& H - ten mamawh an lo thlen ang angte bawhzui a tum thu tarlangin, ultrasound, computer set leh retaining wall- te chu bawhzui hmasak a nih tur thu a sawi a ni.

Lawngtlai Bawrhsap hi Pu Lalngheta Ralte (MJA,Lawngtlai) chuan a tawiawm a ni.