Local Council leh Village Council 2015 inthlan chungchang thlirletna Dr. Franklin Laltinkhuma, Dy. Commissioner, District Municipal Election Officer nibawk hovin vawiin chhun khan a office chamber-ah neih a niin party aiawh leh NGO te bakah inthlan na a official pawimawh te an tel tha hle.
Tluang taka LC leh V/C te thlan zawh a ni leh chet dan phung changkan chhohna ah lawmthu sawiin Aizawl DC chuan Election reng reng hi uluk tak leh fimkhur ngai a niin, sawisel tur neuh neih pawh a bang thei lo, hmasawnna leh insiamthatna tur te a awm laiin tluang taka zawhfel a ni chu lawmthu a sawi a, party hrang hrang aiawh, Media, NGO leh sorkar hnathawk puibawmtu zawng zawng leh vote thlaktute hnenah lawmthu a sawi a ni.
DC chuan party hrang hrang aiawh leh MPF leh YMA aiawhte inthlan chungchanga an ngaihdan leh hmasawn zelna tur atana tha an tih te sawi tura a sawm angin sawi a ni. Election Official thenkhat leh RO thenkhatten an tih tur an tih fel tawk lohna ah DC chuan lo enfel a tum thu a sawi.
Aizawl District ah hian Village Council 95 awm in inthlanna hi Village Council 69 ah neih a ni a. HPC (D) Demand area a Village Council 25-ah Nomination file an awmloh avang leh withdraw leh anih avangin inthlan neih a ni ta lo a ni. Hei bakah hian Tawizo Village Council-ah chuhtu awm lovin INC candidate-te tlinga puan an ni avangin inthlanna neih a ni lo bawk. Aizawl district ah hian Local Council 83 awmin Mission Vengthlang Local Council tel lovin Local Council 82-ah inthlanna neih a ni a Mission Vengtlang Local Council ah erawh chuan Independent candidate-te chu un-contest-a an tlin avangin inthlanna neih a ni lo a ni. Vote thlak zawh ni 30.04.2015 zanah Village Council leh Local Council inthlana a vote chhiar nghal a ni a.
Aizawl District Village Council leh Local Council, 2015 inthlanna tluanga taka zawh anih theih nana thawk tu Official-te, Print & Electronic Media-te, Political Party hrang hrang, NGO hrang hrangte leh Sawrkar Department hrang hrangte hnenah District Election Officer, Aizawl District chuan lawmthu a sawi tak meuh a ni.
