Aizawl City Road Authority chu vawiin chawhnu dar 1:00 khan Chairman Pu Lal Thanzara M.O.S. hovin CM Conference Hall ah an thukhawm a, Aizawl khawpui tihchangtlunna tur thil hrang hrangte ngaihtuahin Dawrpui Veng lunlai Israel Point bul, Bazar Bungkawn leh Assam Rifles Canteen / Mandir (Canteen Square) vela ke-a kalkaina (pedestrian overbridge) siam dan tur te an sawiho. AMC engineer leh sawrkar department kaihhnawih hrang hrang aiawh te leh Dawrpui Local Council hruaitute nen a hmunah enchian ni se an ti a, meeting leh huna thlirho leh ni se an ti. Chanmari YMA Hall kawt kawng rawt hniama RCC hmanga kawng siama, a hnuailam parking atana siam chungchang pawh sawiho a ni a, zirchian phawta a remchan anga hmalak chhoh ni se an ti bawk. Chairman Pu Lal Thanzara chuan PWD lama sum indaihloh laia AMC lamin kawng danga khawpui tihchangtlunna tura ruahmanna an siam thin chu lawmawm a tih thu a tarlang.

Aizawl City Road Authority meeting ah hian ZOHANDCO Chairman Pu R.Vanlalvena, MLA, Pu Lalram Thanga, Principal Secretary, PWD, Pu R.Vanlaltluanga, E-in-C, PWD, Member Secretary, Pu C.T.Zakhuma, Chairman, AMC, Pu Rosiamngheta, Executive Councillor, AMC, Pu Ramhlunsanga, Councillor, AMC leh Pi M.Zohmingthangi, CEO, AMC te an tel a ni.