Baptist Church of Mizoram hnuaia Christian Hospital Serkawn-a School of Nursing chuan vawiin khan '40th Batch GNM Graduation' hun an hmang a, UD&PA Minister Pu Zodintluanga chu Khuallian niin Nurse Graduate mi 15 te hnenah Certificates bakah Award hrang hrang a hlan.

Graduation Ceremony inkhawm Rev. C.L. Malsawma, Chaplain, Christian Hospital Serkawn kaihhruaiah Khuallian Pu Zodintluanga chuan kumtin Serkawn Nursing School atangin Nurse pass chhuak tha tak takte an awm thin chu Principal, Tutor leh Staff te thawhrimna vang a ni tiin a fak a. Vawiina pass chhuak ta Nurse Graduate-te chu ‘mi bik’ an nih tih hre reng turin leh an rawngbawl zelna tur atana vawiina Thutiam an chham theihnghilh ngai lo turin a chah a; Mizoram chhung mai ni lovin rampawn thlengin thawk turin a fuih bawk a ni. Tun atang reiloteah Mizoram Youth Commission kaltlangin Singapore-a Nurse Course zir turin mi 80 vel lak tum a nih thu sawiin Minister chuan Mizo nula leh tlangval rampawna nurse hnathawkte chu an hnathawhnaah fak an hlawh hle thin tih a sawi a, Singapore-a zirna sang zawk an zir theihna tur kawng inhawng tur chu ngaihven turin a chah bawk a ni. Nurse hna chu Pathian ring chungin, tumruhna leh tih takzetna nen thawk a, mi harsa zawkte tanpuitu an ni tih hre reng turin Khuallian Pu Zodintluanga chuan Graduate Nurse-te hnenah a duhsakna sang ber a hlan a ni.

Vawiin Nurse Graduation Ceremony-ah hian Graduate Nurse tharte hmelhriattirna hun School of Nursing Principal Pi Hmingthanmawii Pachuau-in a hmang a. Pi Lalchangliani, Tutor, School of Nursing kaihhruaina hnuaiah Nurse Graduate tharte chuan Thutiam an chham rual a. Rev. H.Lalthlamuana, Dean, Jubilee Bible School, Serkawn chuan nurse zirchhuakte tan tawngtaina hun a hmang bawk. He hunah hian BCM President Rev. C.Ngurhnema, BCM AGS i/c Service Rev.Lalbiaksanga Chinzah, School of Nursing Vice-Principal Pi Vanlalthlengliani leh Mission Coordinator BCM Rev. B. Lalrinawma te pawhin lawmpuina thu an sawi a ni.

Kumdang ang bawkin kumin 2015 Graduate Nurse zirchhuakte zinga ti thate chawimawina leh lawman hlanna hun hman a ni a, kumina Nurse lawmman dawngte chu :

1. Best Graduate Award : Laldintluangi Tochhawng

2. State Level Nurse Exam-a Top 10-a lang : Laldintluangi Tochhawng & Lalbiakdawli

3. Biaklianzuali Award : Laldintluangi Tochhawng

4. Faculty & Staff Welfare-te thlan 'Best Student Award' : Laldintluangi Tochhawng.