No.125/2020-2021
Covid-19 hrileng zel tur ven leh a laka mipuite him theihna tura India ram puma inkharkhipna (Lockdown) dan, March Ni 15 atanga April Ni 14, 2020 thleng awh tur chu Khawzawl district-ah khauh taka kalpui mek zel a ni a. Thupek chhuah zawm that chu Covid-19 laka himna tura pawimawh tak a ni a, inkharkhipna (Lockdown) dan kaltlanga thu chhuak tak zawm lo a palzuttu chu Disaster Management Act, 2005 (Section 51-60) hmanga kum hnih chhung lung In tan leh pawisa chawi tira hrem theih niin, Indian Penal Code Section 188 hnuaiah thla khat chhung Lung In tan leh pawisa chawitira hrem theih a ni. Tun dinhmunah Khawzawl district-ah inkharkhipna (Lockdown) dan zawm tha duh lo mi 2 (Pahnih) te chu Police te’n case siam sak tawhin, IPC Section 440/427/279/336/188/134 thubuai awrhtir an ni a. Heng bakah hian mi dang 16 (Sawmparuk) mante chu PR bond sign tir an nih hnuah chhuah tir leh an ni bawk.
Khawzawl District Bawrhsap Pu H.Lianzela chuan mipuite chu khauh taka dan ken kawha hman kher ngai lova inkharkhipna dan thuchhuah takte tha taka zawm turin a ngen a. Feh chhuanlama lui kal thinte pawh ti tawh lo tura hriattirin, Dawrkaite pawh Chinai hralh chhuak rih tawhlo turin a hriattir a. Inkharkhipna (Lockdown) dan khauh zawka zawm anih theihna turin Police leh Village Level Task Force (VLTF) te bakah, van boruak atanga thlalakna khawl Drone hmanga patrolling neih anih tawh dawn thu a sawi bawk a. Mipuite chu Corona Virus laka him zawk theihna tura hmalaknate thlawpa, inkharkhip hun chhunga pawn chhuak lova mahni in lum theuha inkhung tura hriattirin a ngen nawn leh a ni.
