No.841/2021-2022

Dated Khawzawl, the 7th June, 2021: Vawiin chawhma dar 11:00 khan District Disaster Management Authority (DDMA), Khawzawl District chu June ni 14, 2021 thlenga Lockdown kalpui dan tur ngaihtuahin DC Conference Hall-ah an thukhawm.

Vawiina meeting hi Pu Zothanmawia, Deputy Commissioner leh Chairman, Khawzawl DDDMA chuan kaihruaiin District Headquarters-a dawr leh bazar hawn chungchang leh hnathawh chungchangte ngaihtuah a ni a. Karkhata nihnih- Thawhlehni leh Zirtawpni nilenga dawr hawn chu hman chhunzawm rel niin, dawr hawn hunchhung chu tlailamah darkar khata pawhsei nise tih a ni a, ni dangah chuan mahni ina dawr neite pawh inhralh leh dawr phal a ni dawn lo a ni. Mipui pawnchhuak an tlem zawk nan bazar niahte chauh ATM a pawisa lakchhuah phal nise ti a rel a ni bawk.

Khawzawl District-a phalna neia hmasawnna hnathawh kalpui mektuten an chhuah tanna VLTF atanga phalna la hmasain, hnathawhna-a hman tur bungrua leh hmanrua thiar/phurh phalsak a ni a. Insak kalpui mekte hnathawh dan turte, Mizoram chhung hmun dang atanga Khawzawl District-a lo zin/hawte chungchang pawh ngaihtuah a ni bawk.

District Bawrhsap hoa DDMA meeting-ah hian Khawzawl District-a Covid-19 dinhmun thlirho a ni a. Covid-19 positive enkawl lai 10 (sawm) awm mekin, Covid Care Centre atanga chhuak tawh zat hi mi 69 an ni a, dam chak zawng recovery rate chu 87.34% a ni. Heng bakah hian phai atanga lo haw khunghran lai mi 17 awm mekin, heng zinga mi 5 (panga) te chu TrueNat result nghak lai an ni.

Khawzawlah hian April 21 atanga vawiin thlengin Covid-19 Lockdown kengkawh chhunzawm zel niin, Police, Covid-19 Executive Team leh VLTF te ngawrh takin an duty a. Nimin thleng khan Covid-19 kaihhnawih dan bawhchhia mi 341 man tawh niin, an pawisa chawi tlingkhawm hi Rs. 94,800/- (Cheng singkua, sangli leh zariat) a ni.