No.840/2021-2022

Lawngtlai, Nikir thla ni 7, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga chawlhkar khat (07.06.2021 - 14.06.2021) chhunga inkhuahkhirhna kalpui dan tur an rel.

Chairman, Dr Andrew H. Vanlaldika chuan chawlhkar khat liam ta chhunga Lawngtlaia awmze neia inthlahdul a nih dan leh Lawngtlai District dinhmun te ngun taka ngaihtuah a, chawlhkar khat dang kal leh dan tura uluk taka thutlukna siam turin member kal khawmte chu a chah a. Lawngtlai District-a case tam zawk awmna Chawngteah hri inkai darhna chhu chat tura theih tawp chhuaha hma lak a nih thu leh Community Covid Care Centre (4C) pawh ruahman belh a nih thu sawiin, home isolation atangin 4C-ah hian mi eng emaw zat sawn luh niin, hri inkai darhna chhu chat turin hei hian kawngro a su hle tura ngaih a nih thu a sawi.

DLTF Member Secretary, Lawngtlai District Chief Medical Officer Dr LP Malsawma chuan COVID-19 hri leng kaihhnawiha Lawngtlai District dinhmun tlangpui a tar lang a. Tun dinhmunah Lawngtlai District chhungah COVID-19 positive (active case) mi 260 an awm mek thu leh CCC, 4C leh Home Isolation-ah te enkawl an nih thu a sawi a. Inkhuahkhirhna dan lekkawhtu Executive Duty Nodal Officer Pu R. Lalbiakthanga, District Sericulture Officer hnen atangin report ngaihthlak a ni bawk.

He DLTF thut khawmah hian COVID-19 hri leng tiziaawm tura hma lak dan tur leh inkhuahkhirhna kalpui chhunzawm dan tur zau taka sawi ho a ni a. Lawngtlai District chhungah chawlhkar khat chhung awmze neia inthlahdul kalpui a nih tawh avangin, June ni 14, 2021 (Thawhtanni) zing dar 4:00 thleng chu khauh zawka inkhuahkhirhna kalpui leh rih ni se, tih a ni.

Chawlhkar khat chhung tlan phal a nih hnuin, hri leng laka mipui him tlan zawk nan auto rickshaw leh taxi service chu tihtawp leh lailawk a ni a. Khualzin phur maxi cab-te pawh Mizoram puma inkhuahkhirhna kalpui mek angin an tlan a la rem dawn rih lo bawk a ni.

Dawr hawn chungchangah pawh inkhuahkhirhna tikhauh leh hretin, thlai hnah, chawhmeh leh ni tin mamawh (essential commodity) zuarte chu Thawhlehni leh Zirtawpni-ah te zing dar 5:00 atanga zing dar 9:00 thleng an inhawn remtih a ni a. A bak dawr dang, thawmhnaw leh in sakna bungraw zuar ang chite chu Thawhtanni leh Ningani-ah te zing dar 5:00 atanga zing dar 10:00 thleng an inhawn remtih a ni thung. Thlai hnah, thlai rah leh thei, chhe hma bik ang chi chu dawr hawn theih hun bakah hian VLTF-te'n a tul a nih chuan a mamawhtute ina sem kual (home delivery) dan ruahmanpui ni se, tih a ni a. Thingpui dawr/restaurant te pawh mipui dawr tura inhawng lovin, home delivery erawh an kalpui remtih a ni.

Chawlhkar khat chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tha tih a ni a. Sawrkar office-te chu lockdown hmasaa an kal dan pangngai angin, a pawimawh zual chauh office kai a, a bakin in lam atanga hna thawh chu kalpui chhunzawm ni se, tih a ni.

Kut hna thawh chungchangah khawpui chhungah hna tul zual bikte chu VLTF-te hriatpui leh remtihnain COVID-19 laka him nana sawrkarin fimkhurna tur inkaihhruaina a siam (COVID-19 Appropriate Behaviour) te zawm chungin thawh phal a la ni ang a, hmun khatah mi panga aia tam hna thawh ho erawh khap niin, panga aia tam thawh tul bikah chuan thuneitute hnen atangin zonal officer kal tlangin phalna lak a ngai leh dawn a ni. Khawpui pawna kut hna thawka chhuak turte pawh VLTF-te hriatpuina leh remtihna lehkha nen an luh leh chhuah remtih a ni chungin, curfew leh COVID-19 laka himna tura inkaihhruaina dangte erawh an zawm ngei ngei a tul dawn thung a ni.

Dawr hawn leh hna thawh phal a nih avang hian mipui inkhuahkhirhna thlah zalen a ni ta tihna a ni lo va. State sawrkarin Mizoram puma inkhuahkhirhna thupek a chhuah, clause A.7.1 angin, "Hemi hun chhung hian eizawnna leh tul bik thil ni lova veivah leh inlen pawh khap tlat a ni" a. Eizawnna leh tul bik thila chhuah ngaite chuan mahni veng VLTF-te hriatpuina lehkha an lak zel a ngai dawn a. Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.

Lawngtlai District chhunga inkhuahkhirhna kalpui dan tur kimchang chu Deputy Commissioner-in a la tichhuak dawn a ni.