4244/2025-2026

Aizawl, the 30th January, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) hovin vawiin chawhnu khan 'Ek Bharat Shreshtha Bharat' hmalakna hnuaiah Manipur, Meghalaya, Tripura, Uttar Pradesh bakah Dadra and Nagar Haveli & Daman and Diu-te foundation day lawmna Durbar Hall, Lok Bhavan-ah buatsaih a ni. 

Larsap General (Dr) Vijay Kumar Singh chuan Prime Minister hmalaknaa kalpui 'Ek Bharat Shreshtha Bharat' chuan India ram hnam ziarang hausa tak chawilar a tum tih sawiin, "Kan kalna apiangah hnam ziarang leh nunphungte midang hmuh theiha kan phochhuah a, keini pawhin an hnam ziarang leh nunphungte kan zir hian inhriatpawhtawnna leh inunauna a siam a ni", a ti a. India ram chu ram ropui leh zau tak a nih avangin a ram mipui zinga tam zawkin midangte hnam ziarang leh nunphung an hriat chian loh fo thin thu sawiin, inpumkhat turin midangte hnam ziarang leh nunphung kan zaha kan hlut thiam a pawimawh hle a ni, a ti a. State hrang hrang leh Union Territory-te chanchin tawi chhinchhiah tlak tak takte tarlangin, "Danglam viau mah ila, hei tak hi kan chakna hnar leh hmun khata min phuarkhawm tlattu a ni, a ti a. State dang atanga Mizorama awmte leh Mizo te chu midang hnam ziarang leh nunphungte a tam thei ang ber zira inhriatpawhtawnna tha siam tum turin a chah a ni.

He hun hi Pi Lalhruaitluangi, Addl. PS to Governor chuan kaihruaiin programme buatsaih chhan a sawifiah a. Manipur Larsap Pu Ajay Kumar Bhalla, Meghalaya Larsap Pu C.H. Vijayashankar, Tripura Larsap Pu Indra Sena Reddy Nallu leh Uttar Pradesh Larsap Pi Anandiben Patel te thuchah bakah heng state leh UT te chanchin tarlanna video hnuhnawm tak takte chu thlir ho a ni a. Manipur aiawhin Dr. Ch. Sarakham Aimol, Assoc. Prof., RIPANS leh Tripura aiawhin Dr. Analisha Debbarma, Asst. Prof., CVSc& AH te'n an state chanchin tawi an sawi a. RIPANS leh Govt. Johnson College zirlaite'n hnam lam mawi tak tak an entir a ni.

Manipur, Meghalaya leh Tripura-te hi January ni 21, 1972 khan North Eastern Region (Re-organisation) Act, 1971 hmangin State puitlina hlankai an ni a. Uttar Pradesh hi January ni 24, 1950 khan state-a puan niin, Union Territory pahnih Dadra & Nagar Haveli leh Daman & Diu-te hi January ni 26, 2020 khan Union Territory pakhata chhunfin an ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte foundation day lawmna chu Lok Bhavan, Mizoramah Larsap kaihhruaiin June, 2023 atang khan buatsaih tan a ni.