4245/2025-2026

Aizawl, the 31st of January, 2026 : Reliance Foundation leh Mizoram Football Association buatsaih, naupangte football inelna chu match 10,000 khelh tlin a lo ni ta a, he mi puala Rajiv Gandhi Stadium, Mualpui, Aizawla hun tawi buatsaih chu vawiin khan Sports Minister Pu Lalnghinglova Hmar chuan a hmanpui. Naupang League hnuaiah hian District paliah naupang 3,500 chuang an awm mek.

Pu Lalnghinglova Hmar chuan, "India rama a vawi khatna ni turin Reliance Foundation chuan Mizoramah naupangte awmze neia football an zirna turin League mumal tak a kalpui a, he inelna Naupang League tih hi football hmasawnna atan, naupang chher chhuahna atan leh discipline kenkawhna atan duhthusam a ni," a ti a, a bul țantu zinga a tel ve thei lawmawm a tih thu sawiin tuna a thlen chin chu an ngaihtuah phak piah lam a nih tawh thu a sawi.

He Naupang League hi Aizawl, Lunglei, Champhai leh Kolasib-ah kalpui niin naupang kum 6-14 inkar awmze neia football inelna a ni a, kum 2022-a khelh țan niin a senso hi Reliance Foundation-in a tum a, Mizoram Football Association leh an hnuaia District Football Association-in a kalpui a, naupangte hian kum khatah competitive match vawi 30 chuang an khel a ni.

Mizoram Football Association President ni bawk Pu Lalnghinglova Hmar chuan, "Tun hmain Mizo naupangin an naupanlaiin uniform jersey ha chunga referee hnuaia inkhelhna mumal an nei phak lo a, match 10 pawh khel tling mang loin India inelna an hmachhawn fo tawh ṭhin. Naupang League-a telte erawh chuan kum khatah competitive match 30 chuang in khel a, in nihlawh takzet a, in hmabak a eng hle a ni," tiin naupangte a fuih.

Naupang League bakah hian Reliance Foundation hnuaia kalpui mek Costal League-ah match 10,000  khelh tlin lawmna hi MFA Honorary Secretary Pu Lalrengpuia'n a kaihruai a, MFA hruaitute, Reliance Foundation Young Champs aiawhte, players bakah naupang  nu leh pate an tel a ni.