4588/2025-2026 

Aizawl, the 24th February, 2026: Vawiin khan 'Ek Bharat Shreshtha Bharat' hmalakna hnuaiah Mizoram Larsap General (Dr) Vijay Kumar Singh, PVSM, AVSM, YSM (Retd) hovin Mizoram leh Arunachal Pradesh-te State puitlinga hlankai champhaphak lawmna Durbar Hall, Lok Bhavan, Aizawlah hman a ni. 

Larsap General (Dr) Vijay Kumar Singh chuan state pahnih mipuite duhsakna hlanin, state puitlinga hlankai an nih hnuah Mizoram leh Arunachal Pradesh te'n hmasawnna kawng chak taka an zawh thu a sawi a. State pahnihte chu ram leilung leh tribal hnam ziarang hausa tak nei an nih thu sawiin, a ram leilung tlawh pawh mai harsat avang leh chhan dang dangte avangin hun engemawchen ngaihthah ni mahse, tunhnaiah nasa taka hma an sawn thu a sawi a. Thalaite atanga bul kan tan a, kawng tinrenga hmasawnna kan hnuh luh bawk chuan, India ram changkang leh intodelh 'Viksit Bharat@2047' siamnaah kan tel ve ngei dawn a ni, a ti bawk.

Larsap chuan Mizoram leh Arunachal Pradesh-te chu India ram hmun pawimawh taka awm an nih thu leh Act East Policy-ah hmun pawimawh tak an chan thu a sawi a. Bairabi-Sairang Rel kawng hawn tak chuan hmasawnna a rawn thlen mek thu leh khualzin pawh nasa taka an pun phah thu a sawi a. Mizoram chu India rama ziak leh chhiar thiam vekna state hmasa ber a nih thu sawiin, sawhthing khawpui 'Ginger Capital of India' atana puan a nih thu a sawi a. Arunachal Pradesh chu 'Land of the Rising Sun' tia hriat a nih thu sawiin, tui chakna hmanga kawlphetha siam chhuah theihna hmabak eng tak nei leh Kiwi avanga hriat hlawh a nih thu a sawi bawk. 

He hun hi Pi Lalhruaitluangi, Addl. PS to Governor chuan kaihruaiin programme buatsaih chhan a sawifiah a. Arunachal Pradesh Larsap Lt Gen KT Parnaik, PVSM, UYSM, YSM (Retd) thuchah thlir ho a ni a. Dr. Jenifer Lalbiakdiki, Principal, Govt. T. Romana College leh Pi Api Hiba, MZU Scholar, President, Arunachal Student Union, Mizoram te'n state pahnih chanchin tawi an sawi a. Mizoram leh Arunachal Pradesh chanchin pholanna video tawi hmuh nawm tak thlir ho a ni bawk a. Regional Institute of Paramedical and Nursing Sciences (RIPANS) leh Govt. T. Romana College zirlaite'n Mizo leh Arunachal Pradesh hnam lam mawi tak takte an entir a. Hemi hnu hian Larsap-in hemi puala kalkhawmte Lok Bhavan Upper Lawn-ah kawmin hun hlimawm tak an hmang ho a ni. 

Northeast Areas (Reorganisation) Act, 1971 hnuaiah kum 1972 khan Mizoram chu Union Territory (UT) a puan a ni a. India ram Danpui siamthat vawi 53-na 1986 hmangin India ram State 23-na ni tura hlankai a ni. Arunachal Pradesh hi North-East Frontier Agency (NEFA) tih thin niin, kum 1972 khan NEFA chu Union Territory (UT) ah hlankai a ni a. February ni 20, 1987 khan India ram Danpui siamthat vawi 55-na 1986 hmangin India ram State 24-na a ni ta a ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Lok Bhavan, Mizoramah Larsap kaihhruaiin June, 2023 atang khan buatsaih tan a ni.