Vawiin khan Mizoram Chief Electoral Officer Pu Ashwani Kumar hovin Lok Sabha MP inthlan lo awm tur chungchangah I&PR Auditorium-ah press conference neih a ni a. Lok Sabha inthlan hi vawiin khan April ni 9, 2014 a neih a nih tur thu puan niin, hemi ni vek hian Hrangturzo bialah General Assembly by-election pawh neih nghal a ni ang. Moral Code of Conduct pawh Election puan a nih atang hian hman nghal a ni.
CEO chuan tun tum MP inthlan a EVM hman tur hi Bharat Electronics Limited (BEL) siam a nih tur thu sawiin, inthlan inpuahchahna chu ngawrh taka kalpui zel a ni ang a ti a. Political party theuh ten muanawm leh inzah tawn taka campaign an kalpui a beisei thu a sawi bawk. Electoral Roll hi siam danglam (revised) zel a nih thu leh, mipui ten an duh chuan CEO official website atangin an hming awm leh awmloh te endik a, tih that ngai emaw, paih tur te a awm a nih chuan Electoral Officer hnenah an thlen theih thu Pu Ashwani Kumar hian a sawi bawk.
Lok Sabha Election, 2014 schedule chu hetiang hi a ni:
Notification chhuah – 15th March, 2014
Nomination file theih ni hnuhnung ber – 22nd March, 2014
Nominations endik (scrutiny)ni – 24th March, 2014
Candidate tan inhnuh dawk theih ni hnuhnung ber – 26th March, 2014
Vote thlak ni - 9th April, 2014 Vote chhiar ni – 16th May, 2014
Election hi May ni 28, 2014 hma a zawh vek tum a ni.
