1964/2023-2024

Parliament Special Session ni thumna nimin September ni 20-ah khan Assembly leh Lok Sabha-a hmeichhiate tana seat zaa 33% hauhna tur 'Women's Reservation Bill, 2023' chu Lok Sabha-in a pass ta a. Lehkha ziaka vote laknaa tel MP (LS) Pu C. Lalrosanga pawhin he bill hi thlawpin a vote a ni.

He bill atana vote laknaah hian Lok Sabha Member 454-in a thlawp zawngin an vote a, a thlawp lotu vote 2 a awm thung. He vote thlaknaah hian Prime Minister Pu Narendra Modi bakah Union Home Minister, Pu Amit Shah, Defence Minister Pu Rajnath Singh leh Central Minister dangte an tel a. Eptu lamah Opposition Leader Pu Adhir Ranjan Chowdhury leh Member  dangte an tel bawk a ni.

Nimin (Nilaini) nilenga he bill hi ngaihtuah a nih hnuin zan dar 9 velah Lok Sabha-a vote thlak laia awm bill thlawptu Member hmun thuma ṭhena hmun hnih vote mamawh zat a tlin avangin bill chu pass fel a ni tih Speaker Pu Om Birla'n a puang a ni.