Vawiin chawhma khan Champhai DC Conference Hall-ah kumin Lok Sabha inthlan atana Champhai District chhunga sum senso endiktu tur Expenditure Observer, Election Commission of India in a ruat Pu Lallien Songate IRS hovin Election Expenditure Monitoring (EEM) team hrang hrangten meeting an nei.

Pu Lallien Songate chuan inthlanna felfai leh thianghlim nei thei turin Expenditure Monitoring team hrang hrangten mahni mawhphurhna theuh tha taka an hlenchhuah angaih thu a sawi a. Inthlan senso awm angte pawh hmaih nei lova chhinchhiah zelin inthurual taka thawhho angai a ni, a ti a. Expenditure Observer chuan Lok Sabha inthlan sensoah Candidate tinte chu cheng nuai 70 thleng hman phalsak an nih thu sawiin, inthlan kaihhnawih sum che vel ven uluk angaih thu leh Bank transaction te pawh a hma thla 3 atanga uluk taka lo vil thin angaih thu a sawi a. Candidate ten campaign-na hmanrua atana Pamphlet, Poster leh thildang sem leh tarchi an siamte pawh District chhunga hman ang ang te chu a tul anga Candiadate Expenditure Account-a ziahlan zel angaih thu a sawi bawk.

Expenditure Observer chuan inthlan vuakveta thil thlengte a bik takin sum leh pai senso chelekte chu ECI in ngun takain a vil reng thu leh helam buaipuitu team hrang hrangte chu ngun leh zuala thawk turin a chah a. Hriatthiam loh an neihte zawh hreh lo tur leh team inkarah inpawhna leh thawhhona tha awm se a duh thu a sawi a. Champhai District bikah ramri kaltlanga thil diklo thleng tur ven nan ramri depah te uluk leh zuala duty a pawimawh thu a sawi a. Team tinte chu rilru fim tak hmanga khawtual mite puihna la thin tur leh harsatna awmte hotute hnena thlen thin turin a chah bawk.

Meeting-ah hian Expenditure Monitoring Team hrang hrangten report an pe a, zawhna an neih leh thu thlen duh an neihte thlenin inpawh tlang takin sawihona hun hman a ni. 

Vawiina Observer-in EEM Team-te meeting a neihpuinaah  hian District Election Officer Dr. Naveen Aggarwal, Pi Ethel Rothangpuii, Nodal Officer, EEM, Pu Francis Lalnuntluanga Ralte, Addl SP, Police Nodal Officer leh  Election Expenditure Monitoring Teams hrang hrang, Assistant Expenditure Observers-te, Accounting Team, Flying Squad, Static Surveillance Team, Video Surveillance Team, Video Viewing Team, MCMC, Bank lama hotute leh District Control Room a thawktute an tel kim hle a ni.