Mizoram Chief Electoral Officer (CEO) Pu Ashish Kundra, IAS chuan vawiin khan Lawngtlai tlawhin, Member of Parliament (Lok Sabha) Inthlanpui 2019 atana Lawngtlai District inbuatsaihna leh an dinhmun a enfiah.

Mizoram CEO Pu Ashish Kundra chuan Lawngtlai District-a Chakma Autonomous District Council (CADC) huam chhunga inthlan inbuatsaih dan en turin chawhma lamah Kamalanagar a tlawh hmasa a. Kamalanagar-a hun hman zawhah Lawngtlai pan lehin, chawhnu dar 1-ah helicopter hmangin Lawngtlai a thleng a. Joint CEO Pu H. Lianzela, MCS leh Deputy CEO Pu CC Lalchhuangkima MCS te'n lo tawiawmin, Lawngtlai District Election Officer Pi Shashanka Ala, IAS hovin SP Pu Amit Goel IPS, election official-te leh nodal officer-te leh political party ai awhte'n an lo dawngsawng a ni.

CEO ho hian Lawngtlai DC Conference Hall-ah Lawngtlai District inthlan inbuatsaihna hrang hrang thlir ho a ni a. CEO chuan inthlan felfai taka neih a nih theih nan inthlana mawhphurtute chu theih tawp chhuah turin a chah a ni.

Hemi zawh hian CEO chuan strong room awmna hmun Govt Lawngtlai College-a inthlannaa hman tura EVM leh VVPAT buatsaih fel (commission) mek chu a en nghal a. Vote chhiarna tur counting hall buatsaih dan leh chet vel dan tur ruahmanna te, control room leh thil tul dang buaipui ngai te sawi ho a ni bawk.

Mizoram CEO hian chawhnu dar 3-ah helicopter-in Lawngtlai hi a chhuahsan leh nghal a ni.