Vawiin khan DC Conference Hall, Mamit-ah District Consultative Committee/ District Level Review Committee & District Level Security Committee chu an Chairman Dr. Lalrozama, IAS, Mamit District Bawrhsap ni bawk hovin December 2018 Quarter ending-a Bank hrang hrangte hnathawh dan tlangpui thlira thutkhawm a ni.

Vawiin Meeting-ah hian Mamit District chhunga Bank pakuate Case Deposit Ratio 44.87% a nih thu tarlan a ni a. Bank pakaw zingah MRB Kanhmun-in ti tha berin 102.25% an ni a. RBI Norms ang chuan CD Ratio hi 60% tur anih avangin Mamit District chhunga Bank-te chu 60% hmu phak tura a theih dan kawng zawn nise tih a ni a. A bik takin Priority Sector-a Loan-te chu mipuite hnenah a tam thei ang pe chhuak turin Bank hotute hi ngen an ni.

Pradhan Mantri Employment Generation Programme (PMEGP) hnuaiah December 2018 thleng khan mi 11 hnenah Cheng Nuai 35 pek tawh a nih thu tarlan a ni a. A dang Pending la awmte pawh a ranglama pek thuai nise tih a ni bawk.

Self Help Group Linkage Scheme leh National Rural Livelihood Mission (NRLM) hnuaiah Bank hrang hrangte hian SHG 371 te chu Saving Account hawntir an ni a. Rs. 16.58 lakh deposit tawh niin SHG 86 hnenah Rs 96.14 lakh Loan puktir an nih tawh thu tarlan a ni a. Joint Liability Group (JLG) hnuaiah Bank-te'n dawrtu an la neih loh thu tarlan a ni bawk.

Bank hrang hrangte hian December 2018 thleng khan Bank kalphung inzirtirna hmun hrang hrangah vawi 58 an neih tawh thu tarlan a ni a. Kisan Credit Card (KCC) hnuaiah mi 49 hnenah Rs 41.63 lakh loan pekchhuah tawh a nih thu Meeting-ah hian tarlan a ni bawk.

Mipui hamthatna tura Schemes hrang hrang Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY), Atal Pension Yojana (APY), Pradhan Mantri Jan-Dhan Yojana (PMJDY) leh Pradhan Mantri Mudra Yojana (PMMY) hnuaia mipui Bank Account nei inziaklutte chu an la tlem avangin an Bank Branch-a Account neite chu heng schemes hrang hranga inziaklut tura thurawn pe turin Bank hotute chu ngen an ni a. Mamit District chhunga Bank hrang hrangte chuan Pawisa fai khawih chet tur chungchangah tun dinhmunah harsatna an neih loh thu Meeting-ah hian tarlan a ni.

Area Development Scheme hnuaiah khuai khawi loan leh vawk vulh loan-te pek theih anih thu tarlan a ni a. December 2018 thleng khan Vawk vulh loan hi mi 116 hnenah Rs 179.65 lakh pekchhuah a nih thu tarlan a ni.

Vawiin Meeting-ah hian RBI Representative, NABARD hotute bakah Mamit District chhunga Bank hrang hrang aiawhte leh line Department hotute an tel a ni.