Mizoram Chief electoral Officer (CEO) Pu Ashish Kundra, IAS chuan vawiin khan Lunglei rawn tlawhin Lok Sabha Election 2019 hmachhawn tura inpuahchahna a enfiah.

Pu Ashish Kundra hian chawhma dar 9:30 ah helicopter hmangin Lunglei a rawn thleng a. Jt CEO Pu H. Lianzela leh Deputy CEO Pu CC Lalchhuangkima te’n lo tawiawmin, Lunglei District Election Officer Pi K. Lalrinzuali, Election Officer Pu James Lalnithanga leh official dangten an lo dawngsawng a ni.

CEO ho hian Lunglei Circuit House-ah inthlan inbuatsaihna hrang hrang thlir ho niin District Election Management Plan (DEMP) hnuaia ruahmanna hrang hrangte chipchiar taka sawiho a ni a. Lunglei District-a Assembly Constituency pasariha polling station 188-a duty tur ten an duty na hmun an pan dan tur ‘Vehicle Movement Plan’ mumal tak siam a nih thu DEO Pi K. Lalrinzuali chuan a tarlang a. Inthlanna a hman tur EVM leh VVPAT Commissioning (hman theih tura buatsaih) chu Saikuti Hall-ah ECIL engineer rual 15 ten an buaipui mek thu a sawi bawk. Lunglei SP Pu C. Lalthanmawia chuan chuan election hmachhawn tura dan leh thupek kenkawh kawnga hmalaknate sawiin ‘Security Force Deployment Plan’ mumal tak siam a nih thu leh tun dinhmunah harsatna liantham a awmloh thu a tarlang. Inthlan vuakveta duty tura police mi 430 leh BSF platoon khat ruahman an nih tawh thu a sawi bawk.
CEO chuan election hmanruate EVM leh VVPAT dah thatna Strong Room a hman mek Saikuti Hall a tlawh bakah Convention Centre-a Presiding Officer leh Polling Official te training neihna a tlawh bawk a. Inthlan felfai tak buatsaih tura tih tur hmabak la awmte chu tha taka hlen chhuah tum turin inthlana mawhphurtute chu a chah a ni. Pian phunga rualbanlote tana ruahmanna siam te, photo voter slip sem chhuah dan turte, vote thlak nia inbiak pawhna leh report hrang hrang pek dan tur ruahmanna te pawh thlir ho a ni.

Mizoram CEO hian chawhma dar 11:30 khan helicopter-in Kamalanagar pan turin Lunglei a chhuahsan a ni.