Nizan khan Kolasib DC Office Video Conference hall ah kumin Lok Sabha inthlanpui lo awm tur a tana inpuahchahna kal chho zel ah Kolasib District Election Officer Pu Zoengsanga chuan Press mite a kawm.

DEO chuan inthlanpui puanchhuah anih tawh thu tarlangin puan a nih rual hian Model Code of Conduct chu hman a nih nghal thu a sawi a, Sawrkar hnathawk, Political party leh mipui mimir ten MCC chu an zawm ngei a beisei thu sawiin Chanchinbu mite chuan election kaihhnawiha mipuite hriattur thil pawimawh zirtirna leh thehdarhna kawngah mawhphurna pawimawh tak an neih thu tarlangin thawhhopui ah a sawm bawk a ni.

Pu Zoengsanga chuan MCC hman a nih atang hian party ten punkhawm, kawngzawh, loud speaker hman, etc te chu New Suvidha App hmangin an programme hman duh hun atanga chhiar letin darkar 48 hmaa an dil a ngaih thu tarlangin Sawrkar Department hnuaia hmalakna/works hrang hrang pawh kut thlak tawh/hna thawh tan tawh tiloh chu engmah a thar a thawh a thianglo tih a sawi bawk ani. Election kaihhnawiha zawhna chi hrang hrang nei tan Toll Free Number 1950 ah a zing dar 9:00 atanga zan dar 9:00 thleng a zawh theih a, rualbanlote tana in chhinchhiah tirna bakah wheelchair leh election kaihhnawih thil dang mamawh te tana hman tur PwD App chu Google playstore ah a download theih a, mipui mimir tan election kaihhnawiha sawisel duh emaw complain thehlut duh tan Cvigil App chu Google playstore atangin a download theih bawk a, Flying Squad Team tan complain thehluhna tur Cvigil Investigator App a awm bawk a ni.

Inthlanpui neih hun tur hi ECI chuan nimin tlai dar 5 khan a puang (announce) a, Gazette Notification hi March ni 18 a chhuah tur niin march ni 25 hi nomination thehluhna hun ni hnuhnung ber a ni a, march ni 26 ah endikna (scrutiny) neih ani anga, in hnukdawk (withdraw) duh tan march ni 28 chu a ni hnuhnung ber a tan ruahman a ni. Mizoram chu April ni 11 a inthlang tur kan ni a, May ni 25 ah vote chhiar ani ang.

February ni 22 a final electoral tihchhuah taka tarlan danin Kolasib District ah Vote nei 58,549 an awm a, hmeichhia 28,496 awmin mipa 30,093 an awm mek a ni. Tuirial A/C ah Voter 17,242 an awm a, Kolasib A/C ah voter 21,969 awm in Serlui A/C ah 19,338 an awm a ni. Kolasib Distrcit a A/C Constituency ah hian Polling Station 82 awm in, Sector 16 a then an ni a, heng P/S ah te hian ballot Unit 119, Control Unit 124 leh VVPAT 117 hman a ni ang a, Polling Station 82 zinga Polling Station 11 chu hmeichhe enkawl ‘Dingdi’ Polling Station tura ruahman an ni a, Polling Station 10 chu intlar ngai loa vote thlak theihna hmun ‘Queueless’ polling Station a tan ruahman niin polling Station 14 ah Web Casting tih a ni bawk ang. Kolasib Districta election kaihhnawih thil en/hriat duh nei tan deo.kolasib.gov.in chu tlawh theih ani bawk.