April ni 11, 2019-a Lok Sabha inthlan kan hmachhawn tura inpuahchahna leh thil hriattur pawimawhte sawiho turin vawiin chawhma khan Lunglei Dc Pi K. Lalrinzuali kaihhruaiin a office chamber-ah meeting neih a ni. He hunah hian a kaihhnaih sawrkar official-te, MJA leh political party aiawhte an tel.

Pi K. Lalrinzuali chuan MLA inthlanna neih zawh takah Lunglei District-ah harsatna lian tham awm lova election hlawhtling taka zawhfel a ni chu thil chhinchhiah tlak a nih thu sawiin Lok Sabha inthlan atan pawh District dangte tana entawntlak nih tum turin kalkhawmte a fuih a. Inthlan felfai leh muanawm tak a awm theihna tura thil pawimawhte kalkhawmte sawipuiin inthlan puan atanga Model Code of Conduct hman tan nghal a nih thu a sawi a, Election Commission of India (ECI) ruahmanna siam te ti hlawhtling turin Lunglei District mipuite thawhho puiah a sawm a ni.

Chief Election Commissioner, Sunil Arora chuan nimin tlai dar 5:00 pm khan Mizoram Lok Sabha inthlan hun tur a puang a, hetiang hi a ni:

Inthlan Puan Ni

10.03.2019

 

Notification tih chuan ni

18.03.2019

 

Nomination File tura Last Date

25.03.2019

 

Nomination endik (Scrutiny) Ni

26.03.2019

 

Candidate te inhnukdawk duh te tana last date

28.03.2019

 

Inthlan Ni (Polling Date)

11.04.2019

 

Vote Chhiar Ni

23.05.2019

 

 

Mizoram pumah Mipa – 381991 leh Hmeichhia – 402408 vote nei an awm a. Lunglei District bikah Mipa – 53010 leh Hmeichhia – 53617 awmin Service Voter 563 an awm a ni.

Tun tum inthlan ah hian tun hmaa lo tih thinte chu chhawm zel niin thil thar ruahman belh zel a ni bawk a. Ram pumah EVM leh VVPAt hman tel vek tawh tur niin Sector Magistrate ten an motor ah GPS Tracking System an vuah tawh dawn a. Mizoram Assembly Election neih zawh taka lo tih tawh ang khan Ballot Unit-ah Candidate te thlalak bell eh a ni dawn a. Candidate thubuai lo nei tawh te chuan an thubuai neih dan chungchang hi vawi 3 chanchinbu leh TV-ah Format C-1 hmangin an tarlang tur a ni. Tin, Polling Station-ah EPIC Card bakah Passport, Drving License, PAN Card, Bank Passbook, Job Card, Aadhar Card etc te hman theih a ni ang. Zan dar 10:00 pm leh zing dar 6:00 am inkarah aurinna (loudspeaker) hman khap tlat a ni bawk. Tin Election chungchang zawh duh leh complain duh neite tan Toll Free Number 1950 (Mobile atang chuan 0372-1950) engtik lai pawha phone theih turin Lunglei District Election Office chuan Call Center an ruahman tawh a ni. Candidate tin ten sum an hman theih zat bituk hi Rs. 70.00 lakhs a ni a. ECI chuan kan Environment chhe zel tur venna turin Campaign na-ah Plastic leh Polythene hmang lo turin Candidate-te a hriattir bawk a ni.

 

Attachment

  • Loading attachment...