Vawiin khan Kolasib DC Office Chamber ah kumin Lok Sabha inthlanpui lo awm tur a tana inpuahchahna kal chho zel ah Kolasib District Election Officer Pu Zoengsanga chuan Press mite a kawm.

DEO chuan MP inthlan a tan inpuahchahna chu kalpui zel a nih thu tarlangin, Chanchinbu mite chuan election kaihhnawiha mipuite hriattur thil pawimawh zirtirna leh thehdarhna kawngah mawhphurna pawimawh tak an neih thu tarlangin thawhhopui ah a sawm bawk a ni.

Inthlanpui neih hun tur hi ECI chuan vawiin khan Gazette Notification a chhuah a, march ni 25 hi nomination thehluhna hun ni hnuhnung ber a ni a, march ni 26 ah endikna (scrutiny) neih ani anga, in hnukdawk (withdraw) duh tan march ni 28 chu a ni hnuhnung ber a tan ruahman a ni. Mizoram ah chuan April ni 11 ah Vote thlaka ni ang a, May ni 25 ah vote chhiar ani ang.

February ni 22 a final electoral tihchhuah taka tarlan danin Kolasib District ah Vote nei 58,549 an awm a, hmeichhia 28,496 awmin mipa 30,093 an awm mek a ni. Tuirial A/C ah Voter 17,242 an awm a, Kolasib A/C ah voter 21,969 awm in Serlui A/C ah 19,338 an awm a ni. Kolasib Distrcit a A/C Constituency ah hian Polling Station 82 awm in, Sector 16 a then an ni a, heng P/S ah te hian ballot Unit 119, Control Unit 124 leh VVPAT 117 hman a ni ang a, Polling Station 82 zinga Polling Station 8 chu hmeichhe enkawl ‘Dingdi’ Polling Station tura ruahman an ni a, Polling Station 6 chu intlar ngai loa vote thlak theihna hmun ‘Queueless’ polling Station a tan ruahman niin polling Station 14 ah Web Casting tih a ni bawk ang. Kolasib Districta election kaihhnawih thil en/hriat duh nei tan deo.kolasib.gov.in chu tlawh theih ani bawk.