Kan hma lawka Lok Sabha inthlan lo awm tur atana inpuahchahna kal zelah vawiin khan Lunglei DC Pi K. Lalrinzuali hovin a office chamber-ah Lunglei District huamchhunga dan leh thupek (law and order) dinhmun thlirhona meeting neih a ni. He meeting-ah hian Lunglei SP Pu C. Lalthanmawia, Addl DC Pu Benjamin Lalzama, 2^nd Battalion MAP Coomandant Pu C. Lalmuanpuia leh election kaihhnawih official dangte bakah 61 BSF, 1^st BSF leh SIB aiawhte an tel.

Lunglei DC Pi K. Lalrinzuali chuan boruak muanawm tak hnuaia election kalpui a nih theihna turin dan leh thupek kenkawh kawnga mawhphurtute theihtawp an chhuah a tul thu leh an inkara thawhhona tha a awm a tul thu a sawi a. Inthlan vuakvet ah Silai hmanga intihthaih leh invau a awm loh nan Lunglei District chhunga Silai nei zawng zawng ten an Silai te Police Station/Police Outpost hnai ber a tung tura thuchhuah siam a nih tawh thu a sawi a. He thupek  hi Silai nei zawng zawng ten zawm a, an Silai te chu Police Station/Police Outpost hnai berah tung thuai turin Lunglei DC chuan mipuite a ngen a ni. Lunglei District chu international boundary nei kan nih avangin dan leh thupek kenkawh kawngah fimkhur zual a tul takzet a ni, a ti bawk.

Lunglei SP Pu C. Lalthnmawia pawhin thu sawiin tun dinhmunah Lunglei District-ah silai tung an la tlem thu a sawi a. Model Code of Conduct bawhchhiatna ala awmloh thu a tarlang bawk.   

61 BSF leh 1^st BSF hotute pawhin report pein tun dinhmunah ramri dep khuaah te buaina a awmloh thu an sawi a; election vuakvetah dan leh thupek kenkawh kawngah fimkhur zawk leh chak zawka hmalak an tum thu an sawi bawk.

Election hun chhunga inbiakpawh dan tur ruahmanna MPRO Inspector (Wireless) hova sawiho bawk niin Wireless Set te (GP) 143 leh Wireless set lian (GM) 27 a zavaiin set 170 turin ruahmanna siam a nih tawh thu tarlan a ni a. District Chhungah Check Post pasarih siam a ni dawn bawk a ni.