Kumin Lok Sabha Inthlanpui neih zawh taka vote tlate chu May Ni 23, 2019 (Ningani) hian chhiar ani dawn a. Hemi ni a vote chhiar tura ruat Counting Supervisor leh Counting Assistant-te pualin vawiin khan DC Conference Hall, Champhaiah training buatsaih a ni.

Vawiin Training-ah hian Pu Zoremthara Ralte, SDO (Sadar) chuan Vote tla chhiartu tur sawrkar hnathawkte chu Democrarcy ram lungphum tinghettu tangkai tak  leh  thawktute an nih tih hria a,  rinawm leh phur taka an mawhphurhnate hlen turin a chah a. Inthlan buaipui hna chu neitu chan changa thawhhona tha leh lungrualna nena hlen chi a ni, a ti bawk.

Training thawhkhatnaah hian Pu Alan Lalthanzara, Election Officer chuan Vote chhiar ni atana inpuahchahna leh remruatna hrang hrang awmte a sawifiah a. Pu Remlalliana Hnamte, SO, LR&S-in Vote tla chhiar dan tur leh form pawimawhte sawifiahin a taka entirnna neih   nghal a ni a.  EVM endikna, hawnna leh vote tla chhiar  dante,  VVPAT Paper Slip chhiar dante bakah Form 17 C hmanga vote tlate enfiah dante zirtirna pek an ni  a. Heng bakah hian zawhna leh chhanna hunte siam a ni bawk. Champhai District-a vote chhiar ni a duty tur hian Counting Micro Observer, Counting Supervisor leh Counting Assistant a tan mi 30 theuh ruat an ni.

Ruahman dan chuan 21-Lengteng (ST) A/C (PS 27) biala Vote tla chu Vote tla chhiarna Dawhkan 5 hmangin General Room (Partition A)  DC Office-ah chhiar a ni anga, round 6 chhunga chhiar zawh hman tum a ni a. 22-Tuichang (ST) A/C (PS 26) a vote tlate chu Election Room No 2-ah chhiar tur a ni a, Vote tla chhiarna Dawhkan 5 awmin round 6 chhunga chhiar zawh hman tum a ni.

23-Champhai North (ST) A/C (PS 30) a vote tlate chu  DC Conference Room-ah chhiar a ni  ang a, Vote tla chhiarna Dawhkan 6 awmin,  round 5 chhunga chhiar zawh hman tum a ni a. 24-Champhai South (ST) A/C (PS 25) biala vote tlate chu  General Room (Partition B), DC Office-ah Vote tla chhiarna Dawhkan 4 hmangin  round 7 chhunga chhiar zawh hman tura ruahman a ni a. 25-East Tuipui (ST) A/C (PS 29) a vote tlate chu District Emergency Operation Centre (DEOC)-ah Vote tla chhiarna Dawhkan 5 hmangin  round 6 chhunga chhiar zawh hman tum a ni bawk.

Champhai District chhunga Assembly Constituency 5 awmah Polling Station 137 a awm a, EVM vote tlate chhiarna tur hian Dawhkan 25 awmin,   vote tla zawng zawng chhiar zo tur hian round 30 a ngai dawn a ni. Heng bakah hian Assembly Constituency tina Polling Station engemaw ber 5 thlanchhuah atanga VVPAT Paper Slip-te a tahtawl zela chhiar   a ni bawk ang.