April ni 11, 2019 khi 1-Mizoram (ST) Parliamentary Constituency atana Member of Parliament (Lok Sabha) Inthlanpui 2019 vote thlak ni a ni a. Tukin zingkar atang khan Lawngtlai District chhunga polling party-te chuan an duty-na tur polling station lam an pan tan.

Tukin khan Lawngtlai District chhunga polling station 165-a EVM hman turte dahna strong room awmna Govt Lawngtlai College-ah polling station hla zuala duty tur polling party-te kal khawmin, an bungraw mamawh turte an lak khawm a, an EVM & VVPAT ken turte an enfiah leh vek hnuah an duty-na tur polling station theuh panin an kal chhuak a. Polling party-ah hian polling official-te bakah, security personnel leh driver-te pawh an tel.

Vawiina kal chhuakte hi polling station 62 awmna 36-Tuichawng (ST) Assembly Constituency-a duty tur polling party 49, polling station 68 awmna 37-Lawngtlai West (ST) Assembly Constituency-a duty tur polling party 31 leh polling station 35 awmna 38-Lawngtlai East (ST) Assembly Constituency-a duty tur polling party 4, an zavaiin party 84 an ni a. Hemi bak Tuichawnga polling party 13, Lawngtlai West-a polling party 37 leh Lawngtlai East-a polling party 31 te chu naktuk hian an chhuak ve leh ang.

Polling party kal chhuakte hi Lawngtlai District Election Officer Pi Shashanka Ala, IAS hovin Lawngtlai SP leh election official dangte'n buaipuiin, an vai liam a ni.

Vawiin hian Lawngtlai District-a sector 23-a Sector Officer thenkhat te, Micro Observer-te leh inbiak pawhna lama mawhphurhtute pawh an chhuak ve nghal bawk.