4277/2023-2024

2024 Vau thla ni 21: April ni 19, 2024-a 1-Mizoram Parliamentary Constituency-a Lok Sabha Inthlanpui buatsaih turah Lawngtlai District chhunga inthlan buaipui tur polling official-te thliar felna 1st randomisation chu vawiin chawhma khan Lawngtlai NIC Conference Room-ah District Election Officer Pu Cheemala Siva Gopal Reddy hovin buatsaih a ni.

He hunah hian Deputy DEO Pi B. Malsawmtluangi, Election Officer Pu Denny Lalchhuanawma leh official dangte an tel a. Lawngtlai District chhunga polling station 181-a inthlan buaipui tur, Presiding Officer, Assistant Presiding Officer leh Polling Officer turte chu thlavenga awm tur chhut telin khawl hmanga thliar fel niin, an kalna tur assembly constituency tih fel nghal a ni a. Team inkawp tur leh an kalna tur polling station te chu 2nd leh 3rd randomisation-ah khawl hmang veka tih fel leh a ni ang.

Lawngtlai District chhunga assembly bial pathuma polling station 181 awmah inthlan buaipui turin PRO 1, APRO 1 leh PO 2 ṭheuh an awm dawn a. Hei bakah hian bial tinah 20% zel thlavengin an awm dawn bawk a ni.

Tuichawng biala polling station 70 awm zingah hmeichhe hlang duty-na tur (all women managed) polling station 4 awmin, Lawngtlai West biala polling station 69 zinga 8 chu hmeichhe hlang duty-na tur a ni thung a, Lawngtlai East biala polling station 42 zinga 8 chu hmeichhe hlang duty-na tur a ni bawk. Hei bakah hian assembly constituency tinah ṭhalai hlangin inthlan an buaipuina tur (all youth managed) polling station pakhat ṭheuh ruahman niin, model polling station-a cheibawl tur bial tinah polling station pakhat ṭheuh ruahman a ni bawk.

Attachment

  • Loading attachment...