4090/2023-2024

Khawzawl, 8th March 2024: Lok Sabha Inthlanpui 2024 atana inbuatsaihna kal zelah vawiin khan Khawzawl DC Meeting Hall-ah Deputy District Election Officer Pu Lalfakzuala kaihhruaiin Election Official te leh Khawzawl District chhunga Telecom leh Internet Service Provider te an thu khawm a. Inthlan tluang taka neih a nih theih nan thawhhona tur hrang hrang te an sawi ho.

He meeting kaihhruaitu Khawzawl Deputy District Election Officer (Dy. DEO), Addl DC ni bawk Pu Lalfakzuala chuan Mobile Network leh Internet chak tha chu – chanchin rang taka inhrilhhriatna, information pekna tangkai leh pawimawh ber a nih angin inthlan buatsaih nan a pawimawh em em a ni, a ti a. Inthlan kalpui dan chu Election Commission of India hmunpui atanga hmuh theih turin Internet hmanga thawn thlak thin a nih thu leh inthlan kaihhnawih thil hrang hrang te chu ENCORE Application hmanga upload thin a nih thu Dy. DEO hian a sawi a. He mi kawngah hian Service Provider te thawhpuina tha an hmuh a beisei thu leh khaihlak lova Network/ Internet tha tak an pek theih a beisei thu a sawi bawk a ni.

Pu Timothy R. Lalhmangaiha, Election Officer pawhin hun tiam neia thil tih ngai a nih avangin, Service Provider te thawhpuina a ngen a. Thawhhona tha tak hnuaiah inthlan hlawhtling taka neih a beisei thu a sawi bawk a ni.

Vawiin thutkhawmah hian Khawzawl District chhunga Telecom leh Internet Service Provider – Jio, Tawllawt, G-Net, Netsurf te an tel a ni.