258/2024-2025
2024 Ṭau thla ni 17: Vawiin tlai dar 4:30 khan Lok Sabha Inthlanpui, 2024 buatsaih tura inpuahchahna kal mek chungchangah Lawngtlai District Election Officer Pu Cheemala Siva Gopal Reddy chuan a office chamber-ah thu thar theh darhtute kawmin, Lok Sabha Inthlanpui neih tura Lawngtlai District-a dinhmun leh hmabakte a sawipui.
Lawngtlai DEO Pu Cheemala Siva Gopal Reddy chuan April ni 19, 2024 (Zirtawpni) zing dar 7:00 lehtlai dar 5:00 inkarah Lawngtlai District chhunga polling station 181-ah vote thlak a ni dawn tih sawiin, inthlan buaipui tur polling party 116 te'n vawiinah an duty-na tur hmun an pan thu leh a bak polling party 65-in naktuk lamah an duty-na tur hmun an pan ve leh dawn thu a sawi a. Inthlan vote thlak tawp hun darkar aṭanga chhiar leta darkar 48 (April 17, 2024 tlai dar 5:00)-ah campaign hun tawpin silence period hman a ni dawn tih sawiin, silence period-a media-te kaihhruaina zawm turin MJA member kal khawmte chu a chah a. Kum 2019 MP inthlanah Lawngtlai District-ah vote 63% a tla tih sawiin, kuminah vote 80% tal a tlak theih nan mipui zirtirna lama ṭan lakpui turin chanchinbu mite chu a sawm a ni.
Lawngtlai DEO chuan inthlan buatsaih tura inpuahchahna hrang hrang peih fel a nih tawh thu sawiin, polling station-a mamawh chi hrang hrang pawh ruahman fel a nih thu a sawi a. Vote thlak niah Lawngtlai khawpui chhungah kum upa, vohbik leh harsatna neite ṭanpui turin Scout & Guide te tlawmngaiin an duty dawn tih sawiin, vote thlakna tur EVM leh VVPAT te pawh mamawh khawp bakah, a chhiat thulha thlaveng tur nen phang lo tura ruahman a ni, a ti.
He hunah hian DEO hi Deputy DEO Pi B. Malsawmtluangi, Election Officer Pu Denny Lalchhuanawma leh official dangte'n an ṭawiawm a. President Pu Elvis Lalthangzuala hovin Lawngtlai District MJA member eng emaw zat telin, zawhna leh chhanna leh sawi hona hun hman a ni bawk.
Lok Sabha Inthlanpui, 2024 buatsaih turah hian Lawngtlai District-a polling station 181 zinga 20 chu hmeichhe hlangin inthlan an buaipuina tur niin, 3 chu ṭhalai hlangin inthlan an buaipuina tur a ni bawk a. Hei bakah hian polling station a bika cheibawl, model polling station 3 leh unique polling station 2 ruahman a ni bawk.
Lok Sabha Inthlanpui, 2024 atan hian Lawngtlai District-ah vote nei mipa 46,150 leh hmeichhia 46,305, an vaiin mi 92,455 an awm mek a. He'ng zingah hian kum upa, kum 85 chung lam vote nei mi 235 (0.25%); ṭhalai kum 18 leh 19 vote nei mi 4,905 (5.31%) leh vohbik (PwD) vote nei mi 466 an awm a. April ni 8 aṭanga ni 12, 2024 chhung khan kum 85 chung lam leh vohbik, vote thlak tura polling station pan harsatte tan in lama vote thlak kalpui niin, kum upa mi 128 leh PwD mi 3, an zavaiin mi 131-in postal ballot-in vote an thlak a ni.
Lok Sabha Inthlanpui atan hian venhimna kaihhnawihah pawh uluk leh felfai taka ruahmanna siam niin, Mizoram police, CAPF, IR leh BSF te'n hmun hrang hrangah venhim hna an thawk a. Inbiak pawhna lama harsatna awm thei laka inven nan polling station 122-ah WT set pek a ni a. Bangladesh leh Myanmar ramte nena inrina pawh BSF leh Assam Rifles te'n uluk takin an veng reng a ni.
Attachment
- Loading attachment...
