4213/2023-2024
2024 Vau thla ni 16: Vawiin tlai dar 5:30 khan Lok Sabha Inthlanpui, 2024 buatsaih tur chungchangah Lawngtlai District Election Officer Pu Cheemala Siva Gopal Reddy chuan Lawngtlai DC Conference Hall-ah thu thar theh darhtute kawmin, he Inthlanpui buatsaih tur chungchanga thil pawimawh hrang hrang a sawipui.
Lawngtlai DEO Pu Cheemala Siva Gopal Reddy chuan vawiin chawhnuah Election Commission of India (ECI)-in India ram puma Lok Sabha Inthlanpui neih hun tur a puan thu tar langin, inthlan hi thawh sariha buatsaih a nih tur thu leh 1-Mizoram Parliamentary Constituency-ah chuan a thawh khatna, April ni 19, 2024-ah Member of Parliament inthlanna neih tur a nih thu leh June ni 4, 2024-ah ram pumah a ruala vote chhiar tur a nih thu a sawi a. Inthlan puan a nih rualin election model code of conduct (MCC) hman nghal a ni tih sawiin, sawrkar hna thawk, political party leh candidate-te'n ṭha taka MCC zawm turin a chah a. Inthlanna thianghlim leh felfai tak neih a nih theih nan team hrang hrang - flying squad team, video surveillance team leh sector magistrate te chuan an mawhphurhna ṭheuh an thawk ṭan tih a sawi a. Lok Sabha Inthlanpuiah hian kum 85 chung lam leh vohbik (person with disabilities) te tan mahni bialtu booth level officer (BLO)-te kal tlangin Form 12D hmangin mahni in chhung lum aṭanga vote thlak (home voting) dil theih a nih thu a sawi bawk.
Lawngtlai DEO chuan inthlan kaihhnawihah candidate leh political party-te tan inthlan chuh tura hming pek luhna, affidavit theh luhna leh phalna chi hrang hrang lak nan Suvidha app hmang ṭangkai tur te, mipuite pawh MCC bawhchhiatna an hmuh chuan cVIGIL app hmanga thuneitute hnena thlen ṭhin tur te, candidate-te dinhmun hriat nan Know Your Candidate app hmang ṭangkai tur te'n a chah a. MCC chu khauh taka kenkawh a nih dawn thu leh chanchinbu leh social media-a thu thang dik lo theh darh chu na taka bawhzui a nih dawn thu a sawi a. Lok Sabha MP Inthlanpuiah Lawngtlai District-ah inthlan felfai leh muanawm tak a awm theih nan leh vote nei a tam thei ang berin vote an thlak theih nan ṭan la turin kal khawmte chu chahin, vote nei zawng zawngte chu vote thlak ṭheuh turin a sawm nghal a ni.
He hunah hian DEO hi Lawngtlai District Superintendent of Police Pu Lokeshwaran R., Deputy DEO Pi B. Malsawmtluangi leh official dangte'n an ṭawiawm a. District MJA member eng emaw zat telin, political party leh tlawmngai pawl hrang hrang ai awhte an tel bawk a. Lok Sabha Inthlanpui buatsaih tur chungchanga zawhna leh chhanna leh sawi hona hun hman a ni bawk.
ECI-in inthlan hunbi a ruahman dan chuan gazette notification chhuah hun atan March ni 20, 2024; inthlan chuh tum hming pek luh hun hnuhnung atan March ni 27, 2024; hming pek luhte endik hun atan March ni 28, 2024; candidate inhnuh dawh theih hun hnuhnung atan March ni 30, 2024 te ruat niin, India ram pumah inthlan hi thawh sariha kalpui tur a ni dawn a. 1-Mizoram Parliamentary Constituency-ah chuan a thawh khatna, April ni 19, 2024 (Zirtawpni)-ah inthlan buatsaih tur niin, June ni 4, 2024 (Thawhlehni)-ah ram pumah a rualin vote chhiar a ni ang a, June ni 6, 2024 hmain inthlanna kaihhnawih zawh fel hman tum a ni.
Lok Sabha Inthlanpui, 2024 lo awm turah hian Lawngtlai District-ah polling station 181 awmin, polling station tin hi a cheibawl leh thuam dan tura ECI-in a bituk chin anga chei leh thuam fel vek tawh a ni a. Tun dinhmunah Lawngtlai District-ah vote nei mipa 46,146 leh hmeichhia 46,293, an vaiin mi 92,439 an awm mek a. He'ng zingah hian kum upa, kum 85 chung lam vote nei mi 235; ṭhalai kum 18 leh 19 vote nei mi 4,898 leh vohbik (PwD) vote nei mi 466 an awm a. April ni 1, 2024-a kum 18 tling tur chin tan continuous updation hmangin electoral roll-a la inziah luh theih reng a ni.
Attachment
- Loading attachment...
