229/2024-2025 

Kolasib dated 16th April, 2024: Vawiin chawhnu khan DC Conference Hall, Kolasib ah Video Conference hmangin Dr. Nipun Vinayak, IAS, General Observer chuan Kolasib district-a inthlan kaihhnawih a mawhphurhna hrang hrang changtu Nodal Officer-te chu Lok Sabha MP inthlanpui neihna tur atan a inbuatsaihna kalpui dan sawi hona hun a hman pui a. Pu John LT Sanga, Deputy Commissioner chuan inthlanna felfai leh ralmuang kalpui a nih theih nana hmalakna hrang hrang tarlangin Pu David H. Thangliana, SP, Kolasib chuan dan leh thupek kenkawh chungchang a hmalakna thenkhat a tarlang bawk a ni.

Deputy Commissioner Pu John LT Sanga chuan Kolasib chu Assam nen a ramri thui tak intawm a nih angin inthlanna felfai leh ralmuang a awm theih nan Cachar leh Hailakandi District-a thuneitute nei inbiakpawh reng a nih thu a sawi a. Polling Station 89-a duty tur Polling Official-te hnen ah tum engemaw zah Training pek tawh niin inthlan ni a an duty-na hmun tur tihchianna, ‘3rd Randomization of Polling personel & Micro Observer’ pawh April ni 17 chawhma hian neih tur a nih thu a sawi. Polling Official-te mamawh ken tur bungraw hrang hrang thliar fel tawh a nih thu te, Polling Station tin ah Sector Officer-ten ‘Assured Minimum Facilities’, khawlphetha thlunzawm, inthiarna felfai leh tui thianghlim in tur a awm ngei a ni tih finfiah a nih thu te, EVM dahthatna ‘Strong Room’ rintlak tak ruahman a nih thu DC hian a tarlang bawk a ni.

Vawiin thutkhawm ah hian mipuiin vote thlak an ngaih pawimawh zual zel theih nan Systemic Voters Education & Electoral Participation (SVEEP) kaltlang a hmalakna te, inthlanna a hman tur EVM leh VVPAT endikna kalpui dan te, inthlan chhung a Candidate-te Campaign senso chhinchhiah a nih dan te sawi lan a ni a. Dr. Nipun Vinayak, IAS, General Observer chuan Kolasib district-ah Lok Sabha MP inthlanna felfai leh hlawhtling tak kalpui a nih ngei theih nan kalkhawmte duhsakna a hlan a ni.