799/2026-2027

Kolasib, 2nd June, 2026: Vawiin khan Member of Parliament (Lok Sabha) Pu Richard Vanlalhmangaiha hovin Kolasib-ah District Development Coordination and Monitoring Committee (DISHA) thutkhawm neih a ni. He hunah hian Pu H Dolianbuaia,Kolasib Deputy Commissioner leh Department hrang hrang aiawhte leh prominent citizens te an tel a ni.

He hun hmanpuitu MP Pu Richard Vanlalhmangaiha chuan thu tawi sawiin, department hrang hrang ten theihpatawp chhuaha mipui tana hma an la thin chu fakawm a tih thu a sawi a. Mizoram hmasawnna chu a taka hna thawk tu Department te kutah nasa takin a innghat a ni, tiin, DISHA hnuaia hmalakna hrang hrangte chu chak zawk leh tangkai zawka kalpui a nih theih nan thahnemngai taka thawk zel turin kalkhawmte chu a fuih a ni.

He thutkhawmah hian department hrang hrang ten October 2025 atanga March 2026 inkar chhunga an hmalakna report thenkhat te chu a hnuaiah hian tarlan an ni.

Thingtlang Hmasawnna, Lo Neih leh inkalpawhna: Kolasib District-ah hmasawnna ruhrel leh thingtlang lo neitute chawikanna kawngah hma lakna lian tak tak a awm a. MGNREGS hnuaiah ni za inhlawhna tha taka kalpui a ni a, PMAY-G hnuaiah in thahnem tak sak zawh a ni bawk . WDC-PMKSY 2.0 hnuaiah watershed project lian pathum (Kolasib-I, II leh III) te kalpui mek a ni a. MzSRLM hnuaiah SHG te hmalaknain aieng Metric Ton 71 lai thar chhuah a ni a, hei hian lo neitute eizawnna kawngah nasa takin a pui a ni . Agriculture leh Horticulture lamah pawh PM-RKVY, MIDH leh PM-KISAN hmangin lo neitute hnenah tanpuina pek thin a ni a . Loneitute thlai thar tihhmasawn nan PM-RKVY kaltlangin Chemphai-ah seed multiplication farm leh Thingdawl-ah tissue culture laboratory siam a ni a. PM-KISAN hnuaiah loneitu mi 12,475 hnenah tanpuina pek an ni. Horticulture department chuan dragonfruit, thingfanghma leh hmarcha chin uar chhovin, PMKSY-PDMC hnuaiah tui pek dan changkang zawk (micro-irrigation system) bun a ni bawk.

PMGSY-III hnuaia Khamrang atanga Mualkhang inkar kawng siam hna chu April 2026 thleng khan 73.11% thawh zawh a ni bawk.

Hriselna, Zirna leh Hmeichhe/Naupang Humhimna: Hriselna lamah hma sawnna duhawm tak hmuh tur a awm a, nau piang za a 98% laite chu damdawi inah (institutional delivery) him taka piang an ni a, Ayushman card pawh reporting period chhung hian 531 siam a ni . Poshan Abhiyaan hnuaiah Anganwadi Centre 139 atangin naupang 7,817 leh naupai/hnute pe lai nu 1,000 dawn ten hamthatna an dawng.Hmeichhiate humhimna leh tanpuina turin One Stop Centre (OSC) hmangin theih tawp chhuah a ni a. Zirna lamah Samagra Shiksha kaltlangin school building siamthat, inthiarna siam leh zirlaite tana hamthatna (stipend, escort allowance) hrang hrang pek an ni a, Samagra Shiksha hnuaia Netaji Subash Chandra Bose Avasiya Vidhyalaya (NSCBAV) hmeichhe hostel te pawh tih changtlung zel a ni.

Khawpui Hmasawnna, Tui thianghlim leh Project Dangte: Khawpui hmasawnna leh mipuite tana tui thianghlim pek kawngah PHED in tui lakna (Water Supply Scheme) lian tham Kolasib leh Vairengte-ah an kalpui mek a, hengte hi hman theih tura zawh fel fel thuai tura beisei an ni . Urban Development hnuaiah PMAY (Urban) hmangin in sak tanpuina kalpui a ni a, PM SVANidhi hmangin kawngsira thil zuartute hnenah sumdawnna atana loan pek an ni bawk . Heng bakah hian Land Revenue lamah ram neitu dik tak chhinchhiahna SVAMITVA leh DILRMP kalpui mek a ni a . DoNER leh NEC kaltlangin Kolasib District Hospital khum 100 awm theihna tur sak mek leh project lian dang, Bamboo link road pawh report a a lan danin 85% lai thawh zawh tawh a ni.

Heng hmalakna tarlan bakah hian sawmbik, Railways (NFR), NHIDCL , NEEEPCO leh POWERGRID atangin report tawi ngaihthlak a ni. Thutkhawmna tan a nih hmain Kolasib Bawrhsap lo ni tawh, boral ta Pu Robert C. Lalhmangaiha sun nan kalkhawmte chuan ngawi rengin minute khat hun an hman a ni bawk.